पोखरा ।
पोखरा महानगरपालिकाका मेयर धनराज आचार्यले गौ रक्षाको अभियानलाई सार्थक बनाउन महायज्ञ सफल हुने बताएका छन् । पोखरा महानगरपालिकाको सहयोग तथा राष्ट्रिय परोपकार महासङ्घ नेपालको व्यवस्थापनमा सञ्चालित पुष्करिणी परोपकार गोकुल धाममा बुधवार देखी सुरु भएको श्रीमद् भागवत ज्ञान महायज्ञ उद्घाटन गर्दै मेयर आचार्यले यस्तो बताएका हुन् ।
पोखराको सडकमा बेवारिसे अवस्थामा छाडा छोडिएका पशुचौपायहरुको उद्धार गरी संरक्षण प्रदान गरिएको गोकुल धाम (गौशाला) को दिगो व्यवस्थापनमा महायज्ञ मार्फत महत्त्वपूर्ण सहायता पुग्ने उनले बताए । “बढ्दो जनघनत्वसँगै पोखरामा जथाभाबी रूपमा छोडिएका पशुचौपायका कारण सडक असुरक्षित बन्दै गइरहेको बेला ती पशुचौपायहरुको व्यवस्थापनका लागि व्यवस्थित गौशाला सञ्चालन गरिएको छ”, प्रमुख भने, “यसबाट सडक सुरक्षित बन्ने र यातायात व्यवस्थापनमा सहजता आउनुका साथै गौ रक्षामा टेवा पुग्नेछ ।”
पोखरा महानगरपालिकाले छाडाचौपाया व्यवस्थापनका लागि विभिन्न प्रयत्नहरू गर्दै आइरहेको बताउँदै प्रमुख आचार्यले महानगरको अभियानमा सहयोग पुग्ने गरी व्यवस्थित गौशाला सञ्चालन गरेकोमा राष्ट्रिय परोपकार महासङ्घलाई धन्यवाद दिए । प्रमुख आचार्यले गौशाला सञ्चालनका लागि व्यवस्थापन पक्षसँग आवश्यक समन्वय र सहकार्य गर्दै आइरहेको पनि बताए । गौशालाको दिगो सञ्चालनका लागि महानगरपालिकाको तर्फबाट सबै प्रकारको सहयोग गर्ने उनले प्रतिबद्धता जनाए । “पोखरा अव छिट्टै नै पर्यटनको राजधानी सहर घोषणा हुन गइरहेको छ”, उनले भने, “गौशालालाई पनि पोखराको एक पर्यटन गन्तव्यका रूपमा विकास गरिनेछ, पोखरा आउने पर्यटकहरूलाई यहाँसम्म आउने वातावरण सृजना गरिनेछ ।” छोटो समयमा गौशालाको मुहार फेरिएकामा उहाँले खुसी समेत व्यक्त गरे ।
पोखरा महानगरपालिका वडा नं.१४ का वडाध्यक्ष बोध बहादुर कार्कीले १९ वर्षसम्म फोहोरको विसर्जन गरिएको क्षेत्रलाई व्यवस्थित गौशालाले थप पवित्रता मिल्ने विश्वास व्यक्त गरे । योगी नरहरिनाथले कोटी होम समेत चलाएको उक्त क्षेत्र बात्साय ऋषिको तपोभुमि पनि भएकाले यसको ऐतिहासिक पक्षको समेत उजागर गर्दै संरक्षण, विकास र प्रवर्द्धन आवश्यक रहेको उनले बताए । पोखरा १४ मा एक नयाँ आयाम थपिएको उल्लेख गर्दै उनले महानगरपालिकाको तर्फबाट गौशालालाई गर्नुपर्ने सम्पूर्ण सहयोग गरिनु पर्नेमा जोड दिए ।
राष्ट्रिय परोपकार महासङ्घ नेपालका संस्थापक एवं पुष्करिणी परोपकार गोकुल धामका परिकल्पनाकार भागवत भास्कर युवा पण्डित कमलनयन गौतमले गौ माताको सेवाका लागि नैतिक शिक्षा प्रदान गर्ने उद्देश्यले महायज्ञ आयोजना गरिएको बताए । “महायज्ञ पछि विभिन्न अवधिका शिविरहरू सञ्चालन गर्नेछौँ, विद्यार्थीहरूका लागि नैतिक शिक्षाका कक्षाहरू चलाउने छौँ”, गौतमले भने, “नैतिक शिक्षा र पूर्वीय सभ्यताको समाजमा सिञ्चित गर्ने अभियान गोकुल धामबाट सुरुवात गर्नेछौँ ।” उक्त वात्सायन क्षेत्र र मानपुरी महात्माले साधना गरेको पुण्य भूमि भएको उल्लेख गर्दै गौतमले महायज्ञले यसको ऐतिहासिक पक्षको समेत उजागर गर्ने बताए ।
मन, बचन र कर्मले गौसेवाको पवित्र कार्य गर्न उहाँले आह्वान पनि गरे । “एकै बोरा चोकर किन नहोस्, एकै भारी पराल किन नहोस्, एकै दिनलाई पिलाउन पुग्ने पानी किन नहोस्, जे सक्नुहुन्छ, त्यही साथ सहयोग गौशाला परिसर मै भइरहेको यज्ञलाई माध्यम बनाएर सहयोग गर्न सक्नुहुनेछ”, उनले भने, “मन, बचन र कर्मले यसको उन्नयनका लागि यहाँहरूको सहयोग रहनेछ भन्ने विश्वास लिएको छु ।” सदिऔँ देखि चल्दै आएका संस्कार, संस्कृति र परम्पराहरू हराउँदै गएको उल्लेख गर्दै उहाँले त्यसको जगेर्नाका लागि पनि एकीकृत हुनु पर्ने आवश्यकता रहेको उनले बताए । गौ माताको दुर्दशा र दर्दलाई समाधान गर्न गौशाला सफल हुने उहाँले विश्वास व्यक्त गरे ।
परोपकार वडा इकाई वडा नं.३१ का अध्यक्ष कृष्ण ढुङ्गानाले गौ सेवा नै संसारको सबैभन्दा पुण्य कर्म भएको उल्लेख गर्दै महानगरपालिकाको तर्फबाट उत्कृष्ट गौशाला व्यवस्थापन गरिएको प्रति खुसी व्यक्त गरे । परोपकार अक्षयकोषदाता एवं सामाजिक व्यक्तित्व गिरा कोइरालाले गौ रक्षाका लागि परोपकार महासङ्घको अभियानलाई सबैले सहयोग गर्नुपर्ने बताए ।
पोखरा महानगरपालिकाको आर्थिक विकास महाशाखाका प्रमुख मनहर कडरियाले छाडापशुचौपायका कारण अस्तव्यस्त बनेको पोखरालाई सुरक्षित र सुन्दर बनाउने कार्यमा गौशालाले महत्त्वपूर्ण योगदान गरेको बताए । जथाभाबी सडकमा छोडिएका पशुचौपायहरुका कारण सडक सुरक्षाको जोखिमसँगै ट्राफिक समस्या झेल्नु परेको उल्लेख गर्दै उनले त्यसलाई सदाका लागि समाधान गर्न व्यवस्थित गौशालाको आवश्यकता रहेकामा त्यो आज पुरा भएको उल्लेख गरे । सडकमा पशुचौपाय आउने अवस्थाको अन्त्यका लागि पशुपालनको लगत तयार गरी स्रोत मै व्यवस्थापन गर्ने तयारी गरिएको कडरियाले बताए ।
माघ ४ गतेसम्म सञ्चालन हुने महायज्ञमा बिहीबारदेखि कथा वाचन प्रारम्भ हुनेछ । राष्ट्रिय परोपकार महासङ्घ नेपालका संस्थापक एवं पुष्करिणी परोपकार गोकुल धामका परिकल्पनाकार भागवत भास्कर युवा पण्डित कमलनयन गौतमले कथा वाचन गर्नेछन् । महायज्ञको पहिलो दिन ८० हजार रुपैयाँ दान सङ्कलन भएको छ । गौ माताको रक्षा र गौशालाको दिगो व्यवस्थापनका लागि महायज्ञ आयोजना गरिएको महासङ्घले जनाएको छ । महासङ्घको स्थापना दिवसका अवसरमा गरिने महायज्ञ यस वर्ष भने गौशालामा आयोजना गरिएको हो ।
