काठमाडौं:
कुनै समय हास्य टेलिश्रंखला ‘मेरी बास्सै’मा माग्ने बुढा नामक पात्रबाट हिट भएका केदार घिमिरेको परिवार नै कलाकारितामा लागेका छन्। उनी श्रीमतीदेखि छोरो पनि कलाकारितामा लागेका छन्। सानैमा मेरी बास्सैमा अभिनय गराएका छोरा आशिषलाई माग्ने बुढाले अब फिल्ममा प्रवेश गराएका छन्।
उनी निर्माणाधीन नेपाली फिल्म ‘होस्टेल ३’मा अभिनेताका रुपमा डेब्यु गर्ने भएका छन्। फिल्ममा यसअघि प्रमुख भूमिकामा ‘कुल ब्वाय’ अर्थात् पारस बम, रिहान गिरी, पदम तामाङ र सिम्रन पन्त अनुबन्धित भइसकेको यो फिल्ममा माग्ने बुढाका छोरा आशिष घिमिरे अनुबन्ध भएका हुन्।।
उनले यस अघि हास्य टेलि शृङ्खला ‘मेरी बास्सै’मा आफ्नै पितासँग ‘धुन्धुकारी’ नामक छोराको भूमिकामा अभिनय गरेका थिए। छायाङ्कन अगावै रिलिज मिति घोषणा गरेको यो फिल्म आगामी भदौ २१ गतेबाट फ्लोरमा जाँदैछ। फिल्मको सुटिङ नगर्दै निर्माण टिमले प्रदर्शन मिति आगामी फागुन १६ गतेलाई तोकेका छन्।
फिल्मका निर्देशक सशान कँडेलले त्यो मितिका कुनै फिल्म नजुधोस भनेर अहिले नै फिल्मको प्रदर्शन तोकेको बताए।
आशिषलाई फिल्ममा अनुबन्ध गरेपछि निर्देशक कंडेलले भने,‘यस चलचित्रमा केही प्रमुख पात्रहरू रहेका छन्, जसमा सबै जनाको भूमिका बलियो छ। होस्टेलमा बसेर अध्ययन गर्नेहरू मध्ये एक जना पुरुष कलाकारको जरुरी रहेकोमा हामीले खोजेको जस्तो पात्र आशिषमा पायौँ।’
यस्तै, ‘होस्टेल ३’मा अर्की कलाकार हेना नगरकोटी पनि अनुबन्धित भएकी छन्। हेना थियटर पृष्ठभूमिबाट उनको फिल्ममा प्रवेश भएको थियो। उनले एक्टर स्टुडियोमा लामो समय नाटक गरेकी छन् भने वेब सिरिजहरू ‘खेल’ र ‘साहु बा’मा पनि अभिनय गरेकी छन्। उनको फिल्मको कुरा गर्ने हो भने ‘बाइरोड’ हो।
रिहान गिरी गायन रियालिटी शो ‘भ्वाइस अफ नेपाल’को चौथो संस्करणको टप १० फाइनलिस्ट हुन्। पदम तामाङ भारतको सिक्किममा बहुचर्चित कमेडी कलाकार हुन् जो नेपालको पूर्वी क्षेत्रमा समेत अत्यन्तै चर्चित रहेका छन्। सिम्रन पन्तले मुम्बई र नेपालमा अभिनय प्रशिक्षण लिएकी छन्। यि कलाकार बाहेक अन्य कलाकारहरू पनि फिल्ममा अनुबन्ध भइसकेको र उनीहरूलाई क्रमशः परिचय गराउने निर्देशकले कँडेलले बताए।
यस अघि निर्माण भएको ‘होस्टेल’बाट अनमोल केसी, सलोन बस्नेत, प्रकृति श्रेष्ठ लगायतका कलाकारहरूले डेब्यु गरेका थिए। त्यस्तै, ’होस्टेल रिटर्न्स’बाट स्वस्तिमा खड्का, सुशील श्रेष्ठ, नजिर हुसेन, सुशील सिटौला लगायतका कलाकारहरूले डेब्यु गरेका थिए। उनीहरू सबै नेपाली फिल्का सफल कलाकारहरू बनिसकेका छन्।
अहिले कलाकार परिवर्तन गर्दै फिल्म ‘होस्टेल ३’को निर्माणको तयारीमा छ। यसका लागि माधव शर्माले स्क्रिप्ट लेखिरहेका छन् भने फिल्मलाई सम्मान इन्टरटेन्मेन्टले आरोन कन फिल्म्ससँगको सहकार्यमा निर्माण हुन लागेको हो। यसका कार्यकारी निर्माता शङ्कर कोइराला हुन् भने निर्माताहरू कर्ण कार्की र गोविन्द अधिकारी हुन्। सह निर्माताहरू सुधा मरहट्ठा, सुरेश कँडेल र अर्जुन सापकोटा हुन्। लाइन प्रोड्युसर भेषराज गौतम हुन्।