काठमाडौं :
प्रदीप भट्टराई निर्देशित ‘जात्रा’को तेस्रो श्रृंखला ‘महाजात्रा’को ट्रेलर सार्वजनिक भएको छ। आइतबार काठमाडौं स्थित सिभिल मलमा कार्यक्रमको आयोजना गरि ३ मिनेट ४४ सेकेण्डको ‘कमेडीयुक्त’ ट्रेलर रिलिज गरिएको हो।
ट्रेलरमा तीन पात्र (विपिन कार्की, रविन्द्र सिंह बानियाँ र रविन्द्र झा)ले एक गाडी पैसा लुकाउने जिम्मा पाएपछिको उतारचढावलाई प्रस्तुत गरिएको छ। फिल्मको ट्रेलरका केही पञ्चलाइनले स्वभाविक रुपमा दर्शकलाई हाँसो पैदा गराउँछ ।
फिल्ममा अभिनेता हरिवंश आचार्य खलनायकको भुमिका निर्वाह गरेका छन्। ‘सत्य लुक्दैन, झुटो टिक्दैन’ भन्ने फिल्मको ट्यागलाइन फिल्मको मुख्य कुरा हो। कालो धन र बेरोजगारीको कथामा फिल्म केन्द्रित रहेको ट्रेलरमार्फत अनुमान लगाउन सकिन्छ।
निर्देशक भट्टराईकै लेखन रहेको फिल्ममा वर्षा राउत, राजाराम पौडेल, दिव्यदेव, शिशिर वाङ्गदेल, प्रकाश घिमिरे, अर्जुनजंग शाही, मोहन निरौला लगायतको अभिनय छ। फिल्ममा कार्यकारी निर्माता रविन्द्र सिंह बानियाँ हुन् भने निर्माताहरुमा म्याक्स दीपेश खत्री र यज्ञश्वर पौडेल छन् । फिल्ममा पुरुषोत्तम प्रधानको छायांकन रहेको यो फिल्म आगामी चैत ९ गतेदेखि प्रदर्शनमा आउने तयारीमा छ ।