पोखरा/
चारदिने औपचारिक भ्रमणका क्रममा नेपाल आएका संयुक्त राष्ट्र सङ्घका महासचिव एन्टोनियो गुटेरेसको पोखरामा भव्य स्वागत गरिएको छ । गण्डकी प्रदेश सरकारका मुख्यमन्त्री सुरेन्द्रराज पाण्डे, पोखरा महानगरपालिकाका मेयर धनराज आचार्य, कास्कीका प्रमुख जिल्ला अधिकारी बासुदेव घिमिरे लगायतले गुटरेसको स्वागत गरेका हुन् ।
नेपाली सेनाको विमानबाट पोखरा झरेका गुटरेसको स्वागतका लागि पोखरा पर्यटन परिषद, पोखरा उद्योग बाणिज्य संघ, पोखराका वडाध्यक्ष लगायत पोखराका पर्यटन व्यवसायीहरुको समेत सहभागिता थियो । महासचिव गुटेरेसको पोखरा आगमनले पोखराको विश्वव्यापी पर्यटन प्रवद्र्धनका लागि विशेष महत्व राख्ने विश्वास गरिएको छ ।
महासचिवको आगमनलाई लक्षित गरी सम्पूर्ण सुरक्षा व्यवस्था चुस्त पारिएको छ । महासचिव गुटेरेस आज पोखरा नै बस्नेछन् । गुटरेस मंगलबार बिहान ६ः३० बजे नेपाली सेनाको हेलिकप्टरबाट अन्नपूर्ण आधार शिविर जाने र अन्नपूर्ण सर्किट अवलोकनपछि पोखरा फर्केर पुरानो विमानस्थलमा पत्रकार सम्मेलन गर्ने कार्यक्रम तय भएको छ । भोलि नै उनी गौतम बुद्धको जन्मस्थल लुम्बिनीतर्फ जानेछन ।