काठमाडौँ /
त्रिभुवन विश्वविद्यालयका डीन, क्याम्पस प्रमुख लगायतका पदमा उम्मेदवारले राजनीतिक दलमा आवद्ध नभएको स्वघोषणा गर्नुपर्ने भएको छ ।
विश्वविद्यालयले ‘त्रिभुवन विश्वविद्यालयका सावधिक पदमा नियुक्तिका आधार र मापदण्डसम्बन्धी विनियम, २०८१’ सार्वजनिक गरेको छ, जसमा कुनै पनि पदको उम्मेदवारले दलको सदस्य नभएको स्वघोषणा अनिवार्य गरिएको छ ।
अहिलेसम्म नियुक्तिसम्बन्धी मापदण्ड नहुँदा राजनीतिक भागबन्डा हुने गरेको थियो । तत्कालीन उपकुलपति धर्मकान्त बास्कोटाको पालामा कीर्तिपुर केन्द्रीय विभाग प्रमुखहरूको नियुक्ति सम्बन्धी विनियम बनाएका थिए, जसले ‘वरिष्ठतम शिक्षकहरू मध्येबाट विभागीय प्रमुख हुने,’ व्यवस्था गरेको छ ।
त्यस बाहेकका पदमा गरिने नियुक्तिबारे मापदण्ड भने बन्न सकेको थिएन । प्रा।डा।केशरजंग बराल उपकुलपति भएपछि डिन, कार्यकारी निर्देशक, परीक्षा नियन्त्रक, प्रिन्सिपल र क्याम्पस प्रमुख नियुक्तिसम्बन्धी विनियम ल्याएको छ ।
विनियमले हरेक पदको नियुक्तिका लागि इच्छुक उम्मेदवारले राजनीतिक दलमा आवद्ध नभएको स्वघोषण गर्नुपर्नेछ । त्रिविका रेक्टर प्रा।डा। खड्ग केसी भन्छन्, ‘राजनीतिक भागबन्डालाई निरुत्साहित गर्न यो बुँदा राखिएको हो ।’
हरेक पदका मापदण्ड बनाएर त्रिविको विश्वविद्यालयको नियुक्तिलाई पारदर्शी, प्राज्ञिक, गैरराजनीतिक बनाउन खोजिएको उनले बताए । ‘विश्वविद्यालयलाई प्राज्ञिक बनाउने दृढ संकल्पका साथ विनियम ल्याएका छौं । यसलाई पूर्णतः कार्यान्वयन गराउछौं,’ रेक्टर केसीले भने ।
विनियममा कुनै पनि संकाय वा संस्थानको डीन छनोट तथा सिफारिसका लागि तीन सदस्य छनोट समिति रहने व्यवस्थासमेत गरिएको छ । समितिले त्रिविका ९ संकायका डीनका लागि प्रत्येक संकायगत उत्कृष्ट तीन उम्मेदवारको नाम सिफारिस गरेपछि परिषद्ले नियुक्त गर्नेछ ।
एउटै पदावधिका लागि एउटै व्यक्ति डीन पदमा दुई पटकभन्दा बढी नियुक्त नहुने समेत विनियममा व्यवस्था छ ।
अरू संकायको डीन नियुक्तिका लागि विद्यावारिधि ९पीएचडी० र चिकित्साशास्त्र अध्ययन संस्थानतर्फ एमडीको शैक्षिक योग्यता अनिवार्य गरिएको छ ।
यसका साथै त्रिविमा कम्तिमा १० वर्षको स्थायी पूर्णकालीन प्राध्यापक अनुभव प्राप्त प्राध्यापक वा सहप्राध्यापक हुनुपर्नेछ । सहायक डीनका लागि पनि पीएचडी अथवा एमडी चाहिन्छ, त्रिविमा प्राध्यापन अनुभव भने ८ वर्ष तोकिएको छ ।
कार्यकारी निर्देशक, परीक्षा नियन्त्रक र प्रिन्सिपलका लागि १० वर्ष र क्याम्पस प्रमुखका लागि कम्तिमा ५ वर्ष प्राध्यापन अनुभवलाई अनिवार्य गरिएको छ ।
शिक्षण अस्पतालका कार्यकारी निर्देशकमा नियुक्तिका लागि चिकित्साशास्त्र सम्बन्धी वा जनस्वास्थ्य वा मेडिकल शिक्षामा वा अस्पताल व्यवस्थापन सम्बन्धी विषयमा विशिष्टीकरण गरी स्नातकोत्तर गरेको हुनुपर्ने छ ।
साथै त्रिविमा कम्तिमा ८ वर्षको स्थायी पूर्णकालीन प्राध्यापक, क्लिनिक अभ्यास, अनुसन्धान र प्रशिक्षण तथा प्रशासनसम्बन्धी अनुभवप्राप्त प्राध्यापक वा सहप्राध्यापक अनुभवप्राप्त प्राध्यापक वा सहप्राध्यापक हुनुपर्ने छ ।
मनमोहन कार्डियोथोरासिक भास्कुलर तथा ट्रान्सप्लान्ट सेन्टरका कार्यकारी निर्देशकका लागि चिकित्साशास्त्रको सम्बन्धित विषयमा विशिष्टीकरण गरी स्नातकोत्तर गरेको हुनुपर्नेछ ।
साथै त्रिविमा कम्तिमा ८ वर्षको स्थायी पूर्णकालीन प्राध्यापक, क्लिनिकल अभ्यास, अनुसन्धान र प्रशिक्षण तथा प्रशासन सम्बन्धी अनुभवप्राप्त प्राध्यापक वा सहप्राध्यापक हुुनुपर्नेछ । बीपीकोइराला लायन्स अध्ययन केन्द्रका कार्यकारी निर्देशक पदमा नियुक्तिका लागि पनि सोही अनुसारको योग्यता तोकिएको छ।