काठमाडौं :
फिल्म ‘खजुरै ब्रो’बाट अभिनेत्रीमा डेब्यु गरेकी नीति शाह एकपछि अर्को फिल्ममा अनुबन्ध भएकी छन्। पहिलो फिल्म नै असफल भएता पनि नीति शाहको भाग्य चम्किएको छ। उनले एकपछि अर्को फिल्ममा काम गरिरहेकी छन्। उनलाई खाली बस्नु परेको छैन। खजुरे ब्रोको रिलिजपछि उनले बसन्त निरौलाको फिल्म ‘ज्याइँ साव’को काम गरिसकेकी छन्। यो फिल्मको छायांकन सकिए लगत्तै उनी राजेश हमालको जोडी बनेर फिल्म ‘नरसिंहाः अवतार’मा अभिनय गर्दैछिन्।
आगामी भदौबाट छायांकनमा जाने यस फिल्मको यतिबेला विभिन्न कार्य चलिरहेको छ। दिवाकर भट्टराईको निर्देशनमा बन्न लागेको यस फिल्ममा राजेश जोडिएपछि पनि चर्चाको विषय बनेको छ । यही फिल्मबाट उनी ८ वर्षपछि कमव्याक गर्न लागेका हुन। त्यसकारण पनि फिल्म क्षेत्र गर्माएको हो। यसै साता यो फिल्ममा अनुबन्धित भएकी नीति शाहको निर्माणपक्षले एउटा लुक्स समेत सार्वजनिक गरेको छ। सार्वजनिक लुक्समा नितीलाई महंगो पहिरन र महंगा गहनामा सजिएकी सुन्दरीका रुपमा देखाइएको छ। फिल्ममा उनको भूमिका के हुन्छ भन्ने निर्माण पक्षले अहिलेसम्म सस्पेन्स नै राखेको छ।
नरसिंहाको अर्थ– भगवान विष्णुको उग्र अवतार हो। निर्माणपक्षले बिहिबार फिल्मको घोषणा गरिएसँगै थिम पोस्टर सार्वजनिक गरेको थियो । जहाँ, थिम पोस्टरले युद्धको सङ्केत गरेको छ ।
सार्वजनिक पोस्टरमा प्रयोग गरेको दायामा रातो (आगो) र दायातर्फ निलो समुद्रको रङले फिल्मको कथा युद्ध र शान्तिको हुने संकेत गरेको छ । शान्तिका लागि द्वन्द्व हुने थिम पोस्टरले संकेत गरेको यसले पनि फिल्म द्वन्द्वप्रधान हुने प्रष्ट छ । आगो र पानीले आफ्नो अस्तित्व एकै ठाउँमा रहेर जोगाउन सक्दैनन् । त्यसैले यो लडाईंमा कसले जित्छ भन्ने हो । त्यसैले यसमा भरपुर एक्सन हुने अनुमान लगाउन सकिन्छ। क्रिएटिभ सिने आर्टको प्रस्तुति रहने फिल्म यही भदौबाट छायाङ्कनमा जाने तयारीमा रहेको छ। फिल्मको लगानी तीन करोडभन्दा माथि हुने बताइएको छ। निर्देशक भट्टराईको अर्को फिल्म ‘मायावी’ प्रदर्शनको तयारीमा छ ।