काठमाडौं :
फिल्म ‘पुर्ण बहादुरको सारांगी’को टिजर रिलिज भएसँगै फिल्मका अभिनेता प्रकाश सपुतले ‘वसन्त’को पोस्टर सार्वजनिक गरेका छन्। उनी आफैले निर्देशन गर्न लागेको फिल्म ‘वसन्त’को फस्टलुक पोस्टर सार्वजनिक भएको छ । हरितालिका तीजको अवसरमा निर्माता कम्पनी गलबन्दी प्रोडक्सनले शुक्रबार फिल्मका प्रमुख पाँच कलाकारको चरित्र चित्रित पोस्टर रिलिज गरिएको हो।
कलाकारलाई उनीहरुको आ आफ्नो क्यारेक्टरमा प्रस्तुत गरिएका छन्। फिल्मका मुख्यकलाकार स्वस्तिमा खड्काको पात्रको नाम शान्ति शर्मा, प्रभात पाल ठकुरीको प्रेम आर क्षेत्री, खड्गबहादुर पुन (खबपु)को सत्यबहादुर मगर, प्रकाश सपुतको वसन्त विक र शिवांसी श्रीको सपना विक नाम राखिएको छ। उनीहरु विद्यार्थीको पोशाकमा कापी–कलम च्याप्दै विद्यालयतिर दौडिएको देख्न सकिन्छ।
गायक तथा अभिनेता सपुतकै कथा र संगीत रहने छ भने कार्यकारी निर्मातामा मोहन विश्वकर्मा, अनुरोध भट्टराई र नाना थकाली छन्। भोलीबाट बाग्लुङमा आसपासमा फिल्मको छायांकन हुनेछ। फिल्मका मुख्य कलाकार खड्ग बहालुर पुनले फिल्मको छायांकनका लागि छायांकनस्थल तर्फ लागेको जानकारी दिएका छन्। यता गलबन्दी प्रोडक्सनका कार्यकारी प्रमुख दिल श्रीशले पनि फिल्मको छायांकन शनिबारदेखि बागलुङको धम्जादेखि सुरु हुने जानकारी दिएकी छन्।
फिल्म आगामी चैत २२ गते देशभर प्रदर्शन हुने निर्माण पक्षले एक महिना अघि नै काठमाडौंमा एक कार्यक्रमकाबीच जानकारी दिएको थियो।