पोखरा ।
पोखरामा ३१ औं संस्करणको पोखरा राष्ट्रिय औद्योगिक व्यापार मेला मंसिर अन्तिम साता हुने भएको छ । पोखरा उद्योग वाणिज्य संघको आयोजनामा मंसिर २१ गतेदेखि पुस १ गतेसम्म मेला हुन लागेको छ ।
मेलाको मिति तय गर्न गठित समितिले मंसिरको अन्त्यमा आयोजना गर्न सकिने सुझाव दिएको थियो । ‘मौसम र सबै हिसावले मंसिर २१ देखि मेला गर्दा ठिक हुने देखियो । अग्रज र सरोकारवालासँग पनि छलफल गरेर सोही मिति तोकिएको हो,’ समितिका संयोजक सौगात थापाले भने ।
यसपटकको व्यापार मेलालाई विगतका वर्षहरुमा भन्दा थप परिस्कृत गर्न पनि समितिले सुझाएको छ । इभेण्ट नै इभेण्टको सहर पोखरामा पछिल्ला वर्षहरुको मेला भने फितलो हुँदै गएको छ ।
दर्शकको भीड घटेको छ भने, मेलामा रौनक पनि पातलो बन्दै गएको छ । आजभोलि महोत्सवको संख्या पनि बढेका छन् ।