काठमाडौं :
यहि ३० गतेबाट प्रदर्शनमा आउन लागेको फिल्म ‘ह्रस्व दीर्घ’को पोस्टर तथा टिजरले चर्चा पाइरहेको छ। फिल्ममा समावेश गीतले समेत दर्शकमाझ लोकप्रियता कमाइरहेको बेला फेरि निर्माणटिमले नयाँ पोस्टर सार्वजनिक गरेको छ।
फिल्ममा अभिनय गरेका अभिनेत्रीहरुको पोस्टर रिलिज गरेको हो। पोस्टरमा अभिनेत्री विपना थापाले बच्चालाई स्तनपान गराइरहेकी छन् भने रेखा थापा रिसाहा रुपमा छिन्। यसले पनि दर्शकमाझ एक किसिमको कौतुहलता बढाएको अनुमान गर्न सकिन्छ। किनभने सामाजिक सञ्जालमा यस्तै प्रतिक्रियाहरु आइरहेका छन्।
फिल्ममा रेखा थापा,विपना थापा,सञ्चिता लुइँटेल,नीता ढुङ्गाना,गरिमा शर्मा लगायतका अभिनेत्रीहरुको अभिनय रहेको छ। जम्बो अभिनेत्रीको टिमलाई यो फिल्ममा अटाउने प्रयास निर्देशक चन्द्र पन्तले गरेका छन्। त्यसले पनि यो फिल्मको हाइप बढेको हो।
यो फिल्मको एउटा संवाद पनि सामाजिक सञ्जाल तथा टिकटकमा चर्चामा रहेको पाउन सकिन्छ। ‘घाम नलागेपनि जीवन चल्ला । हावा थाकेपनि जीवन चल्ला । तर, आमा नभए संसार रोकिन्छ । ठप्प ।’ यो संवाद दर्शकमाझ लोकप्रिय छ। नेपाली कलाकार रेखा,नीता,सञ्चिता,गरिमा,नीताका अलवा हरिहर अधिकारीका सार्थ भारतीय कलाकारहरू प्रदीप राउत, ब्रम्मानन्दम, सुनिल वर्मा, अली लगायतका कलाकारहरुको अभिनय छ।
अभिनेत्री नीता ढुङ्गानाकै लगानी रहेको यो फिल्म नेपाली हिन्दी सहित तीन भाषामा प्रदर्शनमा आउन लागेको हो। नेपालमा प्रदर्शनमा आउन लागेको यस फिल्म विदेशका विभिन्न शहरमा पनि प्रदर्शनका लागि बिक्री भइरहेको छ।