काठमाडौं :
प्रदर्शनरत फिल्म ‘रावायण’को प्रचार प्रसारका लागि यतिवेला फिल्मका कलाकार मोफसलका विभिन्न जिल्लामा छन्। बुधवार फिल्मका नायक पल शाह तथा फिल्मकी निमात्री समेत रहेकी नायिका पुजा शर्मा दाङका विभिन्न सिनेमा हलमा दर्शकसँगको साक्षात्कारमा उपस्थित भए।
दाङ घोराहीको मनकासी सिनेमा हल, गणेश चित्रालय तथा नारायणपुरमा रहेको भिएफएक्स सिनेमाजमा पल शाह र पुजा शर्मा पुगेका थिए। उनीहरु त्यहाँ पुग्दा दर्शकको भिडले घेरा भन्दा बाहिर जान सकेनन्।
कलाकार आफ्नै सामु देख्दा दर्शकहरु निकै उत्साहित भएका थिए। हलमा दर्शकहरुले २ घण्टासम्म पल र पूजासँगै बसे फिल्म हेरेका थिए। फिल्म हेरेपछि दर्शकले फिल्ममा नायक पल शाह र नायिका पुजा शर्माले एकदमै राम्रो काम गरेको र फिल्मको छायांकन पक्ष पनि दमदार रहेको प्रतिक्रिया दिएका थिए। फिल्मपछि कलाकारद्धय पल र पुजा दर्शकसँग नाँचेका थिए। पल र पुजाले नेपालगञ्ज र धनगढीका दर्शकसँग पनि साक्षात्कार गरेका थिए।
पल र पुजा दाङ आएको मौका पारी चलचित्र पत्रकार संघ नेपाल दाङ शाखाले नारायणपुरमा रहेको भिएफएक्स सिनेमाजमा साक्षात्कार गरेको थियो । संघका जिल्ला अध्यक्ष सन्तोष केसीको अध्यक्षतामा भएको कार्यक्रममा नायक पल शाहले आफूले फिल्ममा धेरै मिहेनत गरी काम गरेको बताए । उनले दर्शकको चाहाना बमोजिमको फिल्म निर्माण भएको जानकारीसमेत दिए।
नायिका तथा निमात्री पुजा शर्माले फिल्म राम्रो बनेको र फिल्म हेरेका दर्शकले फिल्म मन पराइदिएकोमा खुसी व्यक्त गरिन्। उनले दाङ जिल्लामा आफू पहिलो पटक आएको र आफूले दाङवासीहरुको असाध्यै माया पाउँदा प्रफूल्लित भएको बताइन्।