पोखरा/
नेपाल टुर अन्तर्गत पोखरामा शुक्रबार हुने सांगीतिक कार्यक्रममा सहभागी हुन नेपाली संगीतका लोकप्रिय गायक सज्जन राज वैद्य पोखरा आइपुगेका छन्। पोखरा महानगरपालिकाका प्रमुख धनराज आचार्यले उनलाई विशेष समारोहका साथ पर्यटन राजधानी पोखराको पोखरा ईभेन्ट सेन्टर, बुलौदीमा स्वागत गरेका छन।
नगरप्रमुख आचार्यले गायक वैद्यलाई सम्बोधन गर्दै पोखरालाई विश्वकै उत्कृष्ट पर्यटन गन्तव्यको रूपमा गीतसंगीतमार्फत परिचित गराउन आग्रह गरे। उनले हालै मात्र “पर्यटन राजधानी” घोषणा गरिएको पोखराको प्राकृतिक, सांस्कृतिक, र साहसिक विशेषताको चर्चा गर्दै विश्वभरको पर्यटकलाई आकर्षित गर्न वैद्यजस्ता प्रतिभाशाली कलाकारहरूको भूमिका महत्त्वपूर्ण रहने बताए ।
आचार्यले गीतसंगीतको प्रचार शक्तिलाई पोखराको वैश्विक पहिचान प्रवर्द्धनमा उपयोग गर्ने आफ्नो प्रतिबद्धता दोहोर्याउँदै, पर्यटक आगमनलाई बढाउन महानगरले निरन्तर नवीनतम कार्यक्रमहरू आयोजना गरिरहेको जानकारी दिए।
