काठमाडौं :
अभिनेत्री स्वस्तिमा खड्काले पहिलो पटक निर्माता बनेको फिल्म ‘बेहुली फ्रम मेघौली’मा समावेश गीत रिलिज भएको छ। फिल्ममा समावेश ‘उडायो मन’ बोलको गीत रिलिज गरेको हो। आगामी असोज १७ गते घटस्थापनामा रिलिज हुने यो फिल्मको गीतलाई जयन जे वाइवाले तयार पारेका छन्। गीतको सङ्गीतसँगै शब्द र ऐरेन्ज पनि वाइवाकै हो। गीतमा इन्द्रकला राईको स्वर सुन्न सकिन्छ।
नेपाली भाषासँगै थारु भाषाको गीतसमेत मिश्रण गरिएको यो गीतका मूल सर्जक केशवराज महतो हुन्। थारु शब्दको पुनर्लेखन अशोक थनेतले गरेका छन्। गीतको भिडियोमा फिल्मकी मुख्य अभिनेत्री स्वस्तिमा खड्काले नाचेकी छन्। उनका अलावा सिम्रिक खड्का तथा निश्चल बस्नेत फिचर भएका छन्। गीतको कोरियोग्राफी शेखर घर्ती मगरले गरेका हुन्।
फिल्ममा निश्चल र स्वस्तिमाका अलवा बसुन्धरा भुषाल, बिजय बराल, सिमरन खड्का, लोकेन्द्र लेखक, रक्षा थापा, सिरु बिष्ट, आमिर गौतम, शिशिर सिवाकोटी, टीका पहारी, प्रभाकर शर्मा, लुनिभा तुलाधर, मुकुन्द मैनाली र रामबाबु रेग्मीको अभिनय रहेको छ।
ब्ल्याक हर्स पिक्चर्स र मेघौली फिल्मस्को ब्यानरमा निर्माण भएको फिल्ममा साजन काफ्ले र आकाश बरालको लेखन तथा निर्देशन रहेको छ। यो उनीहरुको डेव्यु निर्देशकिय फिल्म हो। अभिनेत्री स्वस्तिमा खड्कालाई निर्माणमा निर्देशक तथा श्रीमान निश्चल बस्नेतले सघाएका छन्। फिल्मका कार्यकारी निर्माता फिरोज खड्का र शंकर पाण्डे हुन्।
अभिनेता विजय बराल कास्टिङ डिरेक्टर रहेको फिल्ममा नरेन्द्र मैनालीको छायांकन, प्रदीप लामा र केवीका खत्रीको कोरियोग्राफी, जयन जे वाइवा र कुशल पोखरेलको संगीत, निमेष श्रेष्ठको सम्पादन, घनश्याम श्रेष्ठको प्रोडक्सन डिजाइन र केशव पाण्डे र लक्ष्मण पाण्डेको स्टील फोटोग्राफी छ। फिल्मलाई एप्पल इन्टरटेनमेन्ट र डिसिएनले वितरण गर्दैछन्।