काठमाडौँ,
निर्वाचन आयोगले आगामी फागुन २१ गते हुने प्रतिनिधि सभा निर्वाचनमा मतदाता नामावली अद्यावधिक गर्ने भएको छ ।
राष्ट्रपति रामचन्द्र पौडेलले निर्वाचनसम्बन्धी अध्यादेश जारी गरेपछि आयोगलाई मतदाता नामावली अद्यावधिक गर्ने बाटो खुलेको हो । यससँगै मतदाता नामावलीमा नाम समावेश नभएका तर उमेर पुगेका जेनजी पुस्ताले पनि नाम दर्ता गरेर आफ्नो मताधिकार सुनिश्चित गर्न पाउने भएका हुन् ।
निर्वाचन आयोगका प्रवक्ता नारायण प्रसाद भट्टराईले अध्यादेशमार्फत मतदाता नामावली सङ्कलन गर्ने कानुनी बाधा फुकेसँगै आयोगको बैठक बसेर मतदाता नामावली सङ्कलन गर्न मिति तोकिने बताए ।
‘आयोगको बैठक तत्काल बसेर नामावली सङ्कलनको मिति तोक्छौँ,’ भट्टराईले भने, ‘तोकिएको मितिमा नयाँ मतदाता नामावली सङ्कलनको काम सुरु हुन्छ ।’ प्रवक्ता भट्टराईले बिहीबारसम्म आयोगको बैठक बसेर त्यससम्बन्धी निर्णय गर्नेबारे छलफल हुने जानकारी दिए ।