काठमाडौं :
आगामी कार्तिक १५ ‘लक्ष्मी पूजा’मा रिलिज हुन लागेको फिल्म ‘एक्टर : टेक वन’ को टिजर सार्वजनिक भएको छ। निर्माण टिमले शुक्रबार फिल्मको टिजर रिलिज गरेका हुन्।
टिजरमा प्रदिप खड्कालाई विभिन्न चरित्रहरूलाई प्रस्तुत गरिएको छ भने अभिनेता राजबल्लभ कोइरालालाई स्टाइलिस लुक्समा इन्ट्री दिइएको छ। १ मिनेट २० सेकेन्ड लामो टिजरमा, अभिनेत्रीहरू आना शर्मा र दिव्या रायमाझीलाई प्रदिप खड्कासँग रोमान्टिक दृश्यहरूमा प्रस्तुत गरिएको छ, साथसाथै सम्बन्धको केही तनावपूर्ण स्थितिहरूलाई पनि चित्रण गरिएको छ।
टिजरको अन्त्यमा देखिने दृश्य र राजबल्लभको संवादले यस फिल्ममा केही रहस्य रहेको आकलन गर्न सकिन्छ। १० वर्षपछि यो फिल्मबाट कमब्याक गरेका अभिनेता कोइरालाले यसपटक आफ्नो अघिल्लो भूमिकाहरू भन्दा फरक र आधुनिक शैलीको चरित्र निभाएका छन् । यही फिल्मबाट अभिनय यात्रा सुरु गरेकी दिव्या रायमाझीलाई ‘बोल्ड एन्ड ब्यूटिफूल’ रूपमा प्रस्तुत गरिएको छ। दिव्या अभिनेता दिलिप रायमाझीकी छोरी हुन्, र उनले यही फिल्मका लागि अमेरिका छोडेर नेपाल फर्किएकी हुन्।
राजन भुसालले निर्देशन गरेको यो फिल्ममा प्रदिप, आना, र दिव्याका साथ राजबल्लभ कोइराला, दिव्य देव, उषा रजक र सुशील सिटौलालगायतको प्रमुख अभिनय छ । ‘एक्टर : टेक वन’ अदृत फिल्मस् र मोती फिल्मस्को संयुक्त प्रस्तुति हो भने निर्माता थमन कुमार भण्डारी हुन्। अनिश भुसाल सह(निर्माता र क्रियटिभ प्रोड्युसर मोती कार्की हुन्। फिल्मको स्क्रिप्ट आकाश बराल र राजन भुसालले संयुक्त रूपमा लेखेका हुन्।
नरेन्द्र मैनालीको छायांकन रहेको यो फिल्ममा निमेश श्रेष्ठको सम्पादन, राजेन्द्र मोक्तानको रंग संयोजन, र पोस्ट(प्रोडक्सन सुपरभाइजर साहिल खान रहेका छन्। रोयल भिमसेन र ट्राइडेन्ट कन्सेप्ट टिमको पोस्टर तथा पब्लिसिटी डिजाइन रहेको यो फिल्ममा संगीत हर्कुलस बस्नेत, रोहित शाक्य, र एलिस कार्कीले दिएका छन् । कोरियोग्राफी शिशिर खाती र किरण थापाले गरेका छन् । द्वन्द्व निर्देशन अष्ट महर्जनले र कला निर्देशन कृष्णमान तामाङले गरेका छन् ।