पोखरा,
पोखरा महानगरपालिका–९ चिप्लेढुङ्गास्थित प्रमुख व्यापारिक केन्द्र ‘पोखरा ट्रेड मल्ल एण्ड हाउजिङ प्रा.लि.’ ले आफ्नो १४ औं वार्षिकोत्सवको अवसरमा तीन दिने ‘ग्रान्ड फेस्ट २०८३’ आयोजना गर्ने भएको छ । मलले साउन २२ गतेदेखि २४ गतेसम्म विशेष उत्सवका साथ फेस्टिभल आयोजना गर्न लागेको हो ।
बुधबार एक प्रेस विज्ञप्ति जारी गर्दै मलका अध्यक्ष दिपक कुमार मुल्मीले व्यवसायीहरूसँगको सहकार्यमा उक्त कार्यक्रम आयोजना गर्न लागिएको जानकारी दिनुभयो ।
फेस्टिभलका मुख्य आकर्षणहरू
विशेष छुट र सेल अफर: मलमा रहेका विभिन्न प्रतिष्ठित ब्राण्ड तथा व्यवसायीहरूले तीनै दिन ग्राहकहरूका लागि विशेष डिस्काउण्ट र आकर्षक सेल अफरहरू सञ्चालन गर्नेछन् ।
सांगीतिक तथा मनोरञ्जनात्मक कार्यक्रम: मेला अवधिभर चर्चित कलाकारहरूको सांगीतिक प्रस्तुति र विभिन्न मनोरञ्जनात्मक कार्यक्रमहरू हुनेछन् ।
फुड कोर्ट: आकर्षक रूपमा सञ्चालन गरिने फुड कोर्टमा स्थानीयदेखि अन्तर्राष्ट्रियस्तरका स्वादिष्ट परिकारहरूको स्वाद लिन पाइनेछ ।
सामाजिक उत्तरदायित्वलाई निरन्तरता
मलले स्थापनाकाल देखि नै प्रत्येक वर्ष आफ्नो वार्षिकोत्सवमा सामाजिक उत्तरदायित्वका कार्यक्रमहरू गर्दै आएको छ । यस वर्ष पनि विद्यालय स्तरीय वक्तृत्वकला प्रतियोगिता, विपन्न तथा जेहेन्दार विद्यार्थीहरूलाई छात्रवृत्ति वितरण र उत्कृष्ट व्यवसायी सम्मान जस्ता कार्यक्रमहरूलाई निरन्तरता दिइने विज्ञप्तिमा उल्लेख छ ।
भूकम्प प्रतिरोधी प्रविधि र आधुनिक सुरक्षा उपकरणसहित २०७२ साल असोज २६ गतेदेखि औपचारिक रूपमा सञ्चालनमा आएको यस मलमा हाल ५०० भन्दा बढी व्यावसायिक सटरहरू सञ्चालनमा छन् ।
अध्यक्ष मुल्मीले यस फेष्टिवलले ग्राहक, व्यवसायी र मनोरञ्जन क्षेत्रबीचको सम्बन्धलाई थप सुदृढ बनाउने विश्वास व्यक्त गर्नुभयो । साथै, यसले स्थानीय व्यापार प्रवर्धन, बजारलाई चलायमान बनाउन र आन्तरिक एवं बाह्य पर्यटनमा सकारात्मक योगदान पुर्याउने अपेक्षा गरिएको छ । मलले सम्पूर्ण ग्राहक, शुभचिन्तक तथा व्यवसायीहरूलाई फेस्टिभलमा सहभागी भई अवलोकन गर्न हार्दिक निमन्त्रणा समेत गरेको छ ।