काठमाडौं :
फिल्म ‘चित्रा’को सुटिङ पोखरामा धमाधम हुन थालेको छ। निर्माण पक्षका अनुसार शुक्रबार (आज)बाट छायांकन थालिएको हो। सन्तोष अधिकारी फिल्मस्को व्यानर तथा अस्याप इन्टरटेनमेन्ट नेपाल र अस्ट्रेलियाको निर्माण भइरहेको फिल्मलाई घनश्याम लामिछानेले निर्देशन गर्दैछन्। निर्माण पक्षका अनुसार फिल्म आगामी माघे सङ्क्रान्तिलाई लक्षित गरी आगामी पुस २७ गते रिलिज हुनेछ ।
सन्तोष अधिकारीको मुख्य भूमिका रहेको फिल्ममा अर्पण थापा, प्रमोद अग्रहरी, मेनुका प्रधान, शुभेच्छा खड्का, सिम्रन खड्का, आयुशी ढकाल, कपिल शर्मा, कुमार गुरुङ, श्यामसुन्दर कार्की, गीता थापा, उज्वल ढकाल, दिपेश गजुरेल र प्रकाश घिमिरेको अभिनय रहनेछ ।
फिल्मले एक रिटायर्ड बाबु र छोरीको कथालाई प्रस्तुत गर्ने निर्देशन लामिछानेले जानकारी दिए । फिल्म पोखरा र घाचोकमा छायांकन हुनेछ । आशिष थापा मगर निर्माता र सन्तोष अधिकारी कार्यकारी निर्माता रहने ‘चित्रा’ फिल्ममा अजय अधिकारीको कथा रहेको छ।
त्यस्तै मनिष गौतमको पटकथा तथा संवाद, तारा न्यौपानेको मुख्य सहायक निर्देशन रहेको फिल्ममा प्रवीण सिंहको नृत्य, सम्राट बस्नेतको द्वन्द्व, महेश पौडेलको छायांकन, प्रतिमा थापाको प्रोडक्सन हेड र कृष्णबहादुर थापा लाइन प्रोडुसर छन् । फिल्ममा राजन राज सिवाकोटीको गीत संगीत रहनेछ।
केदार पराजुली (श्री कृष्ण फिल्मस्) ले फिल्मको नेपाल अधिराज्यभरको वितरण जिम्मा लिएको छ। फिल्मको अष्ट्रेलिया अधिकार अविनास रोका मगरले लिइसकेका छन । अन्य देशको राइट्स पनि छिट्टै टुंगिने निर्माता एवम् कलाकार सन्तोष अधिकारीले जानकारी दिए।
निर्माता अधिकारी नयाँ फिल्म ‘डलर एयुडी’ को तयारीमा समेत जुटेका छन् । उनका अनुसार यो फिल्मको छायांकन तिहारपछि सुरु हुनेछ । यस अघि सन्तोषले ‘घर’ र ‘आमा’मा सह–निर्माता भएका थिए। । त्यसैको अनुभवलाई उनले यस फिल्ममा लगानी गरेका हुन् । उनको नयाँ फिल्म ‘तीन जन्तु’ प्रदर्शनको तयारीमा छ ।