पोखरा /
पोखरा महानगरपालिका वडा नं.१७ तल्लो बिरौटामा अवस्थित फिस्टेल एकेडेमी माध्यमिक विद्यालयले ‘फिस्टेल स्पोर्टस् फेस्ट’ पुषको पहिलो साता आयोजना गर्ने भएको छ ।
बिद्यालय स्थापनाको २९ औं बार्षिकोत्सबको अबसरमा आगामी पुषको ५ देखि ७ गते सम्म राष्ट्रियस्तरको प्रतियोगिता संचालन हुने शुक्रबार आयोजित पत्रकार भेटघाट कार्यक्रममा जानकारी दिइएको हो ।
‘फिस्टेल स्पोर्टस् फेस्ट’मा बास्केटबलतर्फ छात्र–छात्रा, छात्रतर्फ सेभेन ए साइड फुटबल र जुनियरतर्फ टेनिसका प्रतिस्पर्धा हुने बिद्यालयका प्रबन्ध निर्देशक एलिस रानाभाटले जानकारी दिए ।
प्रतियोगितामा देशभरिका विद्यालयहरूले कक्षा १० सम्म अध्ययनरत विद्यार्थीहरूलाई सहभागी गराउन सक्ने छन् । तीनओटै खेलमा प्रथम, द्वितीय र तृतीय हुने विद्यालयले क्रमशः ७५ हजार, ३५ हजार र २० हजार नगद पुरस्कारका साथमा ट्रफी, मेडल र प्रमाणपत्र प्राप्त गर्ने रानाभाटले जानकारी दिए ।
टेनिसतर्फ छात्र र छात्रा दुवैमा १६ वर्षमुनि, १२ वर्षमुनि र ९ वर्षमुनिका खेलहरू समाबेश हुने छन् । टेनिस प्रतियोगितामा समेत् आकर्षक पुरस्कार रहेको विद्यालयले जनाएको छ । विद्यार्थीहरूमा शैक्षिक विकासका साथसाथै खेलकुदमार्फत उनीहरूको चौतर्फी विकास गराउने उद्देश्यले सो कार्यक्रमको आयोजना गर्न लागिएको कुरा विद्यालयका संस्थापक अध्यक्ष चिनु रानाभाटले जानकारी दिए ।
प्रतियोगिता सम्पन्न गर्न करिब रू १२ लाख खर्च हुने अनुमान गरिएको विद्यालयका अध्यक्ष रानाभाटले बताए ।
कास्की जिल्ला खेलकुद बिकास समितिका अध्यक्ष तोरण बानियाँले पोखरालाई खेल पर्यटन सहरको रूपमा बिकास गर्न विभिन्न खेल प्रतियोगिता नियमित आबश्यक पर्ने हुदा आबश्यक सहयोग गर्ने प्रतिबद्धता व्यक्त गरे ।
विक्रम संवत् २०५१ मा स्थापना भई लामो समयसम्म शिक्षा र खेलकुद क्षेत्रमा महत्वपूर्ण योगदान पुऱ्याउँदै विद्यालयले एसईई २०७९ मा ४ जिपिए सहित शतप्रतिशत विद्यार्थी उत्तीर्ण गराउन सफल भएको थियो ।
विद्यालयले विगत दुई वर्षदेखि आफूलाई गण्डकी प्रदेशकै एकमात्र प्रगतिशील विद्यालय (Progressive School) को रूपमा अगाडि बढाउँदै आएको छ । आईबी पिवाईपी (IB PYP) प्रस्तावित सो विद्यालयले आयोजना गर्ने उक्त खेलकुद प्रतियोगितामा देश भरीका विभिन्न विद्यालयहरू सहभागी हुने अपेक्षा गरिएको छ ।