काठमाडौं । अफगानिस्तानका चर्चित क्रिकेटर नवीन उल हक फेरि चर्चामा छन् । आईपीएलमा विराट कोहलीसँगको विवादका कारण चर्चामा आएका नवीन उल हकलाई अफगानिस्तान क्रिकेट बोर्डले ठूलो झटका दिएको छ ।
अफगानिस्तान क्रिकेट बोर्डले नवीन उल हक, मुजिब उर रहमान र फजलहक फारुकीलाई कुनै पनि फ्रेन्चाइजीबाट खेल्न प्रतिबन्ध लगाएको छ ।
वास्तवमा, यी तीन क्रिकेटरहरूले आफूलाई वार्षिक केन्द्रीय सम्झौताबाट टाढा राख्न माग गरेका थिए, ताकि उनीहरू आईपीएल जस्ता फ्रेन्चाइजी क्रिकेट प्रतियोगिताहरूमा खेल्न सकून्।
तर यसमा कडा कारबाही गर्दै अफगानिस्तान क्रिकेट बोर्डले यी तीन खेलाडीको वार्षिक सम्झौता मात्र रोकेको छैन, आगामी दुई वर्षको लागि केन्द्रीय सम्झौताबाट छुट्टिनको लागि एनओसी {नो अब्जेक्सन सर्टिफिकेट} दिन पनि अस्वीकार गरेको छ ।
यसको मतलब यी तीन खेलाडीले अहिले कुनै पनि विदेशी लिग खेल्न पाउने छैनन् ।
अफगानिस्तान क्रिकेट बोर्ड {एसीबी} ले आफ्नो विज्ञप्तिमा यी तीन खेलाडीले सेन्ट्रल कन्ट्र्याक्ट स्वीकार्नुको सट्टा कमर्सियल लिग खेल्नलाई प्राथमिकता दिएको र यो आफ्नो राष्ट्रिय जिम्मेवारी भए पनि अफगानिस्तानबाट खेल्न नचाहेको बताएको छ ।
बोर्डले यी तीन खेलाडीलाई अनुशासनात्मक कारबाही गर्ने निर्णय पनि गरेको छ । बोर्डले यस विषयमा गहिरो छानबिन गर्न समिति पनि गठन गरेको थियो ।
एसीबीले यस समितिलाई क्रिकेट बोर्डको हितलाई कसरी प्राथमिकता दिने भन्ने पनि बताउन आग्रह गरेको थियो ।
यस समितिका एक सदस्यले भने, ‘यी तीन खेलाडीले औपचारिक रुपमा एसीबीलाई आफूहरूलाई केन्द्रीय सम्झौताबाट हटाउन आग्रह गरेका थिए ।’
यस समितिले गरेको सिफारिसमा यी खेलाडीलाई जनवरी १, २०२४ देखि एक वर्षको लागि केन्द्रीय अनुबन्ध दिन नहुने भनिएको छ । एसीबीले आवश्यकता अनुसार यसबारे निर्णय लिन सक्छ।
यी तीन खेलाडीलाई आगामी दुई वर्ष एनओसी नदिन पनि सिफारिस गरिएको छ ।
यी सुझावलाई स्वीकार गर्दै अफगानिस्तान क्रिकेट बोर्डले बोर्डको मुख्य उद्देश्य राष्ट्रिय टोलीको तर्फबाट खेल्नेलाई प्राथमिकता दिनु रहेको बताएको छ । साथै, बोर्डले भनेको छ – सबै खेलाडीले यसलाई स्वीकार गरी राष्ट्रिय हितलाई व्यक्तिगत स्वार्थभन्दा माथि राख्नुपर्छ ।
नवीन उल हक आईपीएलमा लखनऊ सुपर जाइन्ट्सबाट खेल्छन् भने फारुकी सनराइजर्स हैदरावादबाट खेल्छन्। दुवै टोलीले यी दुई खेलाडीलाई रिटेन गर्ने निर्णय गरेका थिए ।
हालै भएको लिलामीमा मुजिबलाई कोलकाता नाइट राइडर्सले किनेको थियो । अफगानिस्तान क्रिकेट बोर्डको यो निर्णयले यी तीनको आईपीएल खेल्नेमा प्रश्न उठेको छ ।
यदि एसीबीले समयमै यी तीनलाई एनओसी नदिए उनीहरुलाई यस पटकको आईपीएल खेल्न गाह्रो हुनेछ । यी खेलाडीहरू आईपीएलमा मात्रै नभई विश्वका धेरै टी–२० लिगमा पनि खेल्छन् र यो उनीहरुको आम्दानीको प्रमुख स्रोत हो ।