काठमाडौँ :
फिल्ममा धमाधम कलाकार भित्राएका निर्देशक प्रदिप शाहीले अन्तत फिल्मको नाम सार्वजनिक गरेका छन्। उनले निर्देशन गर्ने साईफाई–जोम्बी थ्रिलर फिल्मको नाम ‘एक्लो–१’राखिएको छ।
घोडेजात्राको अवसर पारेर निर्माण पक्षले फिल्मको एउटा पोस्टर समेत सार्वजनिक गरेको छ। फिल्मको पोस्टर सार्वजनिक गर्दै निर्देशक शाहीले फिल्म ट्राइलोजी(तीन भाग) मा निर्माण हुने बताए।
फिल्मको पोस्टरले ‘एक्लो–१’ हाल बनिसकेका र बन्दै आइरहेका फिल्मभन्दा फरक स्वादमा बन्ने सम्भवाना देखाएको छ। पात्रको अनुहार नखुलाइ स्पेस सुटमा प्रस्तुत गरिएको पोस्टरमा नेपालको झण्डा अंकित भएको देख्न सकिन्छ।
स्पेससुट लगाएका पात्र को हुन स्पष्ट नभएपनि फिल्मका मुख्य कलाकार प्रदिप खड्का रहेको अनुमान गर्न सकिन्छ। यसैगरी पोस्टरमा एक जोम्बी अनुहारलाई नेपथ्यमा प्रस्तुत गरिएको छ।
फिल्ममा प्रदिपका अलावा बेनिशा हमाल,विजय लामा, दीया पुन, कविता नेपाली, एवनराज उप्रेती तथा सुनिल थापाको अभिनय रहनेछ। शाइ प्रोडक्सन नेपालको ब्यानरमा निर्माण हुने चलचित्रमा ह्याम्साएर एकाउन्टेनको सहकार्य रहने छ। हाल सेट डिजाइनको काम र प्री प्रोडक्सनको सुरुवात भई रहेको कार्यकारी निर्माता क्षितिज सुवेदी खत्रीले बताए।
निर्माता खत्रीका अनुसार छायाँकनका लागी नेपालमा नै पहिलो पटक अन्तरीक्षमा जाने रकेटको निर्माणको तयारी भई रहेको छ। फिल्म आगामी साउनको अन्तिमबाट छायाँकनमा जाने तयारीमा रहेको निर्देशक शाहीले जानकारी दिएका छन्