काठमाडौं :
चलचित्र ‘गोर्खा वारियर’ का निर्माता तथा अनुग्रह समूहका अध्यक्ष सुमन राईले ६ हजार ४ सय ७६ मिटर अग्लो मेरा पिक हिमालको सफल आरोहण गरेका छन्। साहसिक र प्रेरणादायी अभियानका साथ सम्पन्न भएको उक्त हिमाल आरोहणपछि उनको अबको लक्ष्य सगरमाथाको सफल आरोहण रहेको छ।
बेलायतमा व्यवसाय र सामाजिक उत्तरदायित्वमा सक्रिय रहेको अनुग्रह समूह अन्तर्गत अनुग्रह सुनचाँदी पसल, नयाँ अनुग्रह सुनचाँदी पसल, अनुग्रह बुलियन, अनुग्रह घडी केन्द्र, अनुग्रह यात्रा सेवा, अनुग्रह सुन केन्द्र तथा अनुग्रह प्रतिष्ठान सञ्चालनमा छन्।
पूर्व गोर्खा सैनिक मिलन चाम्सद्वारा निर्देशन गरिएको चलचित्र ‘गोर्खा वारियर’ मा निर्माता सुमन राई रहेका छन्। गोर्खालीहरूले रचेको इतिहास समेटिएको यस चलचित्रको पहिलो प्रदर्शन बेलायतको लन्डनस्थित लिसेस्टर स्क्वायरमा रहेको ठुलो पर्दा सिनेमा घरमा गरिएको थियो, जसले नेपाली चलचित्र क्षेत्रमा एउटा नयाँ कीर्तिमान स्थापना गरेको मानिन्छ।
सामाजिक सेवामा समेत सक्रिय अनुग्रह प्रतिष्ठानले आफ्नो आम्दानीको दश प्रतिशत शिक्षा, स्वास्थ्य, खानेपानी, वृद्ध सेवा, बालबालिका तथा गाउँ विकासका क्षेत्रमा लगानी गर्दै आएको छ। ‘शून्यदेखि सगरमाथासम्म’ भन्ने नारासहित सुरु गरिएको यो अभियानको आगामी चरण सगरमाथा आरोहण तथा वातावरणीय चेतना फैलाउनेतर्फ केन्द्रित हुनेछ।
सुमन राईको यो अभियान ‘उत्थान सामाजिक अभियान’ मार्फत जलवायु परिवर्तनविरुद्ध जनचेतना फैलाउने, वातावरण जोगाउने र भावी पुस्ताका लागि सुरक्षित पृथ्वी निर्माणमा सन्देश दिने उद्देश्यले अगाडि बढाइएको हो।
यस अभियानमा अनुग्रह समूहका शुभेच्छुकहरूसँगै बेलायतमा रहेका नेपाली समुदायका संस्था— एनसीसीए युके, एनसिसी युके, तमु धिं युके, किरात राई यायोख्खा, खोटाङ समाज र थुलुङ राई समाजलगायत विभिन्न संघसंस्थाहरूको उल्लेखनीय साथ, समर्थन र उत्साहजनक सहभागिता रहेको छ।