म्याग्दी,
म्याग्दीको अन्नपूर्ण गाउँपालिका–७ दोसल्लेमा १२ वर्षपछि खेलमैदान निर्माण भएको छ । ओरेन्ज युवा क्लबले २०७० सालमा पाखो सम्याएर शुरु गरेको खेलमैदानको निर्माणकार्य सम्पन्न भएको हो ।
उपभोक्ता समितिका अध्यक्ष प्रेम पाइजा पुनले युवाहरूको अगुवाइमा समुदायस्तरबाट शुरु भएको खेलमैदान निर्माण सम्पन्न गर्न पर्याप्त आर्थिक स्रोत नहुँदा १२ वर्ष लागेको बताए । खेलमैदान निर्माणका लागि दोसल्लेवासीलाई पछिल्ला छ वर्षयता अन्नपूर्ण गाउँपालिकाले निरन्तर सहयोग गरेको थियो ।
आर्थिक वर्ष २०७६÷७७ देखि २०८१÷८२ सम्म पालिकाबाट ३४ लाख र गण्डकी प्रदेश सरकारबाट पाँच लाख गरी ३९ लाख रुपैयाँ विनियोजन भएको थियो । खेलमैदान निर्माणपछि खेलअभ्यास र प्रतियोगिता गर्न सहज हुने भएको छ ।