काठमाडौं :
नयाँ वर्षको छेको पारेर चैत्र २७ गते रिलिजमा आउन लागेको फिल्म ‘राम नाम सत्य’ अब सोलो रिलिज हुने भएको छ । सो मितिमा प्रदर्शनको तयारीमा रहेका अन्य नेपाली फिल्महरू पछि सरेपछि निर्देशक माइकल चन्द को यो फिल्मले एक्लै बक्स अफिसमा प्रतिस्पर्धा गर्ने अवसर पाएको हो ।
फिल्म रिलिज अगावै यसमा समावेश ‘धागोले बाटेको, हुम्लाको लिमी’ बोलको गीत र सार्वजनिक टिजरले दर्शकमाझ राम्रो चर्चा बटुलिरहेका छन् । एक्सन, प्रेम, इमोशन र सस्पेन्सको मिश्रण रहेको दाबी गरिएको फिल्मप्रति दर्शकको चासो बढ्दो देखिन्छ।
फिल्ममा विराज भट्ट, सुशील श्रेष्ठ, सुपुष्पा भट्ट, दिव्या रायमाझी, आयुष सिंह ठकुरी, खुशी कार्की, सुनिल थापा, प्रशान्त ताम्राकार र दिनेश डीसी लगायतका कलाकारहरूको अभिनय छ ।
यसैबीच, अभिनेत्री दिव्या रायमाझी ले फिल्मप्रति आफ्नो उत्साह व्यक्त गर्दै यो आफ्नो करिअरको फरक प्रस्तुति हुने बताएकी छन् । उनले आफूले यसपटक पहिलेभन्दा फरक शैलीमा काम देखाउने मौका पाएको बताउँदै फिल्ममा आफ्नो भूमिका ‘आधुनिक राजकुमारी’को रहेको खुलाएकी छन् ।
उनका अनुसार फिल्म एक्सनमा मात्रै सीमित नभई इमोशन, प्रेम र सस्पेन्सको सन्तुलित संयोजन हो । “मैले मेरो फिल्म भनेर मात्र भनेको होइन, ‘राम नाम सत्य’ साँच्चै गज्जब बनेको छ,” उनले भनिन्, “दर्शकले पूर्ण मनोरञ्जन लिनुहुन्छ भन्ने विश्वास छ ।”
फिल्ममा दिव्या रायमाझी र सुशील श्रेष्ठ को जोडी देखिनेछ । दिव्याले सुशीलसँग काम गर्न सहज भएको अनुभव समेत साटेकी छन्। निर्देशक माइकल चन्द कै पटकथा तथा संवाद रहेको फिल्ममा उपेन्द्र शाही र स्वेता बिमलीको लगानी रहेको छ ।