पोखरा,
पोखरा उद्योग वाणिज्य संघको अध्यक्षका लागि तेस्रोपटक उम्मेदवारी घोषणा गरेका युवा व्यवसायी अर्जुन पोखरेलले यसपटकको अभियानलाई निर्वाचन जित्ने प्रतिस्पर्धाभन्दा पनि पोखराको निजी क्षेत्रलाई नयाँ दिशामा अघि बढाउने योजनाका रूपमा प्रस्तुत गरेका छन्।
दुईपटक निर्वाचनमा पराजित भइसकेका पोखरेल हारबाट पछि हटेनन्। बरु विगतका निर्वाचन अनुभव र पछिल्लो समय विदेशका विभिन्न सहरमा गरेको व्यावसायिक अध्ययन तथा भेटघाटलाई आधार बनाउँदै उनी फेरि व्यवसायीमाझ पुगेका छन्।
पोखरेलको मुख्य जोड पोखराको उद्योग, उत्पादन, व्यापार र पर्यटनलाई अन्तर्राष्ट्रिय बजारसँग जोड्नेमा छ। उनका अनुसार पोखरा अन्तर्राष्ट्रिय विमानस्थल सञ्चालनमा आउनु ठूलो पूर्वाधार उपलब्धि भए पनि त्यसको वास्तविक लाभ लिन अन्तर्राष्ट्रिय व्यापारिक सम्बन्ध र आर्थिक गतिविधि विस्तार गर्न आवश्यक छ।
उनले पोखरा उद्योग वाणिज्य संघको नेतृत्वमा विमानस्थल निर्माणका लागि भएको पहललाई अब अन्तर्राष्ट्रिय व्यावसायिक सम्बन्ध विस्तारमा उपयोग गर्नुपर्ने बताए।
“अन्तर्राष्ट्रिय विमानस्थल निर्माण हुनु मात्रै पर्याप्त छैन। त्यसलाई अन्तर्राष्ट्रिय सहरसँगको नियमित संवाद, व्यापारिक सम्बन्ध र आर्थिक गतिविधिसँग जोड्नुपर्छ,” पोखरेलले भने।
यही सम्भावनाको खोजीमा आफूले पछिल्लो समय करिब एक महिना विभिन्न देशका सहरमा व्यवसायी, उद्योगी तथा सम्बन्धित क्षेत्रका व्यक्तिहरूसँग भेटघाट गरेको उनले बताए। विदेशका बजार, व्यापारिक वातावरण र आर्थिक गतिविधि नजिकबाट नियालेपछि आफू पोखरा फर्किएको उनको भनाइ छ।
पोखरेल विदेशमा देखेका अभ्यास र सम्भावनालाई पोखरामा प्रयोग गर्न चाहन्छन्। विशेषगरी पोखरामा उत्पादित वस्तु तथा सेवाको अन्तर्राष्ट्रिय प्रवर्द्धन, पर्यटनसँग व्यापारिक सम्बन्ध विस्तार र विदेशी व्यवसायीसँग साझेदारी निर्माणमा उद्योग वाणिज्य संघले नेतृत्व लिनुपर्ने उनको धारणा छ।
उनका अनुसार निजी क्षेत्र, सरकार, पर्यटन क्षेत्र र अन्तर्राष्ट्रिय व्यावसायिक समुदायबीच निरन्तर संवाद स्थापित गर्न सके पोखरालाई उद्योग, उत्पादन र व्यापारको नयाँ केन्द्रका रूपमा विकास गर्न सकिन्छ।
“प्रवर्द्धन र प्रभावकारी अन्तर्राष्ट्रिय सम्बन्ध कायम गर्न सकियो भने पोखराको उद्योग, उत्पादन तथा व्यापार–व्यवसायलाई सहज रूपमा विस्तार गर्न सकिन्छ,” उनले जोड दिए।
दुईपटकको निर्वाचन अनुभवसँगै व्यवसायीहरूसँगको निरन्तर सम्पर्क र विदेशमा पछिल्लो समय हासिल गरेको अनुभवलाई यसपटकको अभियानमा जोड्ने पोखरेलको तयारी छ।
उनले विदेश भ्रमणलाई केवल व्यक्तिगत वा पारिवारिक यात्राका रूपमा नलिएको बताए। विदेशका सहरमा देखेका सम्भावना र सिकाइलाई पोखराको निजी क्षेत्रको हितमा प्रयोग गर्ने उद्देश्यले आफू पुनः सक्रिय भएको उनको भनाइ छ।
“विदेशका सहरमा देखेका सम्भावना र सिकाइलाई अब पोखराको हितमा प्रयोग गर्न चाहन्छु। त्यसैले फेरि पोखरा फर्किएको छु—आफ्नो शहर, आफ्ना व्यवसायी र निजी क्षेत्रका लागि केही गर्ने उद्देश्यले,” पोखरेलले भने।
तेस्रोपटक अध्यक्ष पदमा उम्मेदवारी दिएका पोखरेलको अभियानसँगै अबको प्रतिस्पर्धा केवल नेतृत्व परिवर्तनको विषयमा सीमित रहनेछ वा पोखरालाई अन्तर्राष्ट्रिय व्यापारिक सहरका रूपमा अघि बढाउने दीर्घकालीन योजनामा केन्द्रित हुनेछ भन्ने चासो व्यवसायीमाझ बढेको छ।