काठमाडौं :
गायक तथा अभिनेता प्रकाश सपुतले आफ्नो डेव्यु निर्देशकिय फिल्म ‘वसन्त’को पहिलो गीतलाई दर्शकले रुचाएका छन्। शनिबार शनिबार राजधानीमा एक कार्यक्रमकाबीच रिलिज गरिएको गीतलाई दर्शकले रुचाएका हुन्। यति बेलो यो गीत २४ घण्टा नपुग्दै युट्युबको ट्रेन्डिङमा उक्लिएको थियो र अहिले पनि सोही स्थानमा रहेको छ।
हाल यो गीत युट्युबको ट्रेन्डिङ अर्न्तगत म्युजिक सेक्सनको तेस्रो नम्बरमा छ। सार्वजनिक गीतले दर्शकमाझ चर्चा पाइरहेकाले युट्युब ट्रेन्डिङको शिर्ष स्थान तर्फ आफ्नो पाइला बढाइरहेको छ। गायक, अभिनेता तथा निर्देशक समेत रहेका सुपतले नै शब्द रचना र संगीत तयार पारेको गीतको अडियो र भिडियो दुवै पक्ष अब्बल रहेको प्रतिक्रिया पाइरहेको छ।
गीतको कमेन्टबक्समा दीपक विश्वकर्मा नामका दर्शकले लेखेका छन्, ‘प्रकाश सपुतको यो कलालाई उच्च सम्मान छ । यो सिनेमा ‘वसन्त’ सुपरहिट बन्न सफल बनोस् । शुभकामना ।’ यता अर्का दर्शक अनिलले लेखेका छन्, ‘म त प्रकाश सपुतको प्रतिभा र क्षमता देखेर अचम्मै पर्छु । भगवान छन भने र भगवानले मान्छे बनाउछन भने साच्चिकै फुर्सदमा धेरै समय खर्चेर बनाएको मान्छे जस्तो । आहा कति प्रतिभाशाली ।’
यस्तै अर्का दर्शक दीपक बस्नेतले लेखेका छन्, ‘हाम्रो पुरानो सव्यता संस्कृति जोगाउने अहिलेको एकमात्र पुरुष प्रकाश सपूत । तिमी साचिँकै सपूत हौं ।’ उनीसँगै गीतको कमेन्टबक्समा अर्का दर्शक हिमाल सागर हिङमाङ्गले लेखेका छन्, ‘बिस्तारै नयाँ पिढीँहरु यसैगरी नेपाली मौलिक लोक गीतहरुमा भिज्दै गइरहेको देखिन्छ यो सबै कथावस्तुको प्रभावले हो । जो प्रकाश दाईले आफ्ना प्रस्तुतीहरु मौलिकपन एकपछि अर्को गर्दै दिइरहनु भएको छ । सिनेमा ‘वसन्त’को सम्पुर्ण टिमलाई उच्च सफलताको कामना गर्दछु ।’
सार्वजनिक गीतमा सपुत र गायिका शान्तिश्री परियारले गाएका छन्। फिल्मको पहिलो गीत सार्वजनिक भएसँगै भिडियोमा देखिएका सबै कलाकारसहित विशेषगरी मुख्य भूमिकामा अभिनय गरेका गायक सपुत र अभिनेत्री स्वस्तिमा खड्काको जोडी सुहाएको भन्दै तारिफ गरिरहेका छन्। यस फिल्ममा प्रकाश र स्वस्तिमासँगै प्रभात पाल ठकुरी, श्री शिभान्सी, उर्मिला लाम्गादे र खड्क बहादुर पुन, अनुप बराल, कमलमणी नेपाल, प्रकाश घिमिरे लगायतका कलाकारको पनि अभिनय रहेको छ।
गलबन्दी प्रोडक्सनको प्रस्तुति रहने सोसल ड्रामा सिनेमामा कथा, पटकथा र संगीत पनि सपुतले नै तयार पारेका हुन् । विपन्न विश्वकर्मा समुदायको छोराको लेखक बन्ने सपना र लक्ष्य हासिल गर्न उसले गर्ने संघर्षको कथा सिनेमाले भन्ने छ । सिनेमाको निर्मातामा मोहन विश्वकर्मा र बिन्दु बोहोरा तथा कार्यकारी निर्मातामा अनुरोध भट्टराई, नाना थकाली र विरेन्द्र नारायण श्रेष्ठ छन्। फिल्मलाई सुसन प्रजापतिले खिचेका हुन्। काठमाडौं उपत्यकामा डिसिएन र मोफसलमा एफडी कम्पनिले सिनेमालाई वितरण गर्नेछन्।