काठमाडौं :
निर्देशक दिवाकर भट्टराई करिब चार वर्षपछि पुनः निर्देशनमा कमव्याक गर्ने भएका छन् । उनी फिल्म ‘मायावी’मार्फत निर्देशनमा कमव्याक गर्न लागेका हुन् ।
उनको पछिल्लोपटक निर्देशन गरेको फिल्म ‘क्याप्टेन’ रहेको थियो। निर्देशक भट्टराईले श्रीकृष्ण जन्माष्टमीको अवसर पारेर ‘मायावी’को घोषणा गर्दै फिल्ममा कमव्याक गर्न लागेको जानकारी दिएका छन्। फिल्ममा भट्टराई स्वयंको कथा रहनेछ । निर्देशक भट्टराईका अनुसार प्रेमकथाको फिल्ममा तीन ‘नायक’ र दुई ‘नायिका’ रहनेछन्।
फिल्ममा दुई नायिकामध्ये यसअघि नै नायिका दीपिका प्रसाई फाइनल भइसकेकी छन् । फिल्म ‘ऐश्वर्या’ पछि दिवाकर र दीपिकाको यो दोस्रो सहकार्य हो । फिल्मका अन्य कलाकार र प्राविधिक चाँडै सार्वजनिक गरिने निर्देशक भट्टराईले बताए ।
क्रिएटिभ सिने आर्टस्ले निर्माण गर्न लागेको फिल्ममा एसडी योगीको संगीत, राम थापा अविरलको गीत रहनेछ ।
फिल्म असोज २ गतेबाट फ्लोरमा जानेछ ।दिवाकरले फिल्म ‘मेरो जीवन साथी’, ‘स्टुपिड मन’, ‘ड्रिम्स’, ‘ऐश्वर्य’ र ‘क्याप्टेन’ निर्देशन गरिसकेका छन्।