काठमाडौं :
प्रदर्शन मिति नजिकिँदै जाँदा नेपाली चलचित्र ‘गौँथली’को अहिले चर्चाको केन्द्रमा छ। दुई दशकअघि ‘गौँथली’ नाममा डा. भोला रिजालले चलचित्र निर्माण गरेका थिए । उक्त चलचित्रलाई नेपालको पहिलो ‘गीति फिल्म’ (म्युजिकल फिल्म) मानिन्छ।
‘गौथली’ले प्रदर्शनको ५१औँ दिन मनाएको थियो। अहिले सोही नाममा डा. भोला रिजालका छोरा तथा निर्देशक डा. कपिल रिजालले नयाँ चलचित्र ‘गौँथली’ निर्देशन गरेका छन्।
साउन १ गतेबाट प्रदर्शनको तयारीमा रहेको यो चलचित्रको ५ दिनअघि युट्युबमा रिलिज भएको ट्रेलरले दर्शकलाई आकर्षित गर्न सफल देखिएको छ । ट्रेलरले ७ लाख ३० हजार भन्दा बढी भ्यूजसहित मुभी सेक्सनतर्फ ट्रेनिङको पहिलो स्थान समेत कब्जा गरेको छ। यस चलचित्रको ट्रेलर हेरेपछि दर्शकहरूले उत्साह व्यक्त गरेका छन् । ट्रेलरमार्फत नै दर्शकको मन जित्दै सिनेमाप्रति उच्च कौतुहलता जगाएको छ। ट्रेलरले पाएको यो ‘हाइप’ ले साउन १ गतेदेखि फिल्मले बक्स अफिसमा राम्रो व्यापार गर्ने अपेक्षा गरिएको छ।
ट्रेलरले एउटी ग्रामीण भेगकी युवती ‘गौँथली’ (सिम्रन खड्का) को शिक्षाप्रतिको तिर्खा र उनले भोग्नुपरेको सामाजिक पीडालाई कलात्मक रूपमा प्रस्तुत गरेको छ । ट्रेलरको सुरुवातमा स्कुले जीवन र पढाइमा अब्बल गौँथलीलाई देखाइएको छ, जसका गुरुले उनलाई ‘एसएससी’ पास गराउने सपना देख्छन्। तर, पारिवारिक बाध्यताका कारण उनको बालविवाह हुन्छ ।
विवाहपछि गौँथलीको जीवनमा आउने उतारचढाव ट्रेलरको मुख्य आकर्षण हो । अरुण क्षेत्रीले निर्वाह गरेको पात्र केही भिन्न र सरल स्वभावको देखिएको छ, जसले गौँथलीको पढ्ने चाहनामा साथ दिन खोज्छ । तर, घरकी सासू र समाजको कठोर सोचले उनको पुस्तक जलाइन्छ र उनलाई पढ्नबाट वञ्चित गरिन्छ।
ट्रेलरमा अभिनेता अरुणको अभिनयले धेरैको ध्यान खिचेको छ। उनको ‘अनोठो’ र ‘निर्दोष’ चरित्रले फिल्ममा केही नयाँपन दिने संकेत गरेको छ । त्यस्तै, अभिनेत्री सिम्रनले गौँथलीको भूमिकामा जीवन्त अभिनय गरेकी छिन् । आँशु, संघर्ष र विद्रोहको भाव उनको अनुहारमा स्पष्ट देख्न सकिन्छ। ‘छोरीलाई पढाउनुपर्छ’ भन्ने मूल सन्देश बोकेको यो चलचित्रले पहाडी भेगको यथार्थ परिवेशलाई समेटेको छ यस कारण ‘गौँथली’ले समाजमा सकारात्मक सन्देश दिने विश्वास पनि दर्शकहरूले व्यक्त गरेका छन्। ट्रेलरलाई प्राप्त प्रतिक्रिया हेर्दा यो सिनेमाप्रति दर्शकको चासो उल्लेख्य रूपमा बढेको देखिन्छ।
भोला रिजाल प्रोडक्सन र सुमन गिरी प्रोडक्सनको प्रस्तुतिमा बनेको चलचित्रमा अरुण र सिम्रनसँगै मदनकृष्ण श्रेष्ठ, प्रकाश घिमिरे, लुनिभा तुलाधर, रवीन्द्र झा, ईश्वरी बराल, सन्जोग रसाइली, सीतादेवी तिमिल्सिना, लक्ष्मीनाथ तिमिल्सिना र राजेन्द्र नेपालीको अभिनय रहेको छ । बाल कलाकारका रूपमा अंशु ओली र प्रिन्स नेपालीले अभिनय गरेका छन् । यस चलचित्रको कार्यकारी निर्माता सरला रिजाल छिन् । निर्माताको रूपमा सुमन गिरी र डा. कपिल रिजाल छन् । इन्दु गिरी, मनिष रिजाल, प्रलय रिजाल र जीवन ओली सह–निर्माताको रूपमा रहेका छन् ।
डा. भोला रिजालको कथा रहेको चलचित्रको पटकथा तथा संवाद लेखनमा निर्देशक डा. कपिलसँगै निश्चल कुँवर, निरज नेपाल र गिरिराज घिमिरेले सहकार्य गरेका छन् । गिरिराज घिमिरे मुख्य सहायक निर्देशक रहेको यस चलचित्रमा हरि हुमागाईंको छायांकन, मिलन श्रेष्ठको सम्पादन मुकेश शाहको ध्वनि मिश्रण, राजेन्द्र मोक्तानको रङ संयोजन, रामजी लामिछाने र मौसम हिमालीको कोरियोग्राफी रहेको छ ।