काठमाडौं :
सल्यानको मनोरम पर्यटकीय गन्तव्य कुपिण्डे दह प्राकृतिक सौन्दर्यमा मात्र सीमित रहेन, यतिबेला यो कर्णालीलाई विश्वसामु चिनाउने सिनेमाको पर्दा बन्न तम्सिएको छ। “घुमौँ कर्णाली, हेरौँ कर्णाली” र “जनजनमा नेपाली फिल्म, मनमनमा नेपाली फिल्म” भन्ने मूल मर्मलाई आत्मसात गर्दै आयोजना गरिएको तेस्रो कर्णाली अन्तर्राष्ट्रिय फिल्म महोत्सवको दोस्रो दिन कुपिण्डे दहको किनारमा भव्यताका साथ सम्पन्न भएको छ। सुर्खेतबाट आरम्भ भएको यो कला र पर्यटनको कुम्भमेलाले कर्णालीको लुकेको कला, संस्कृति र प्राकृतिक छटालाई फिल्मको लेन्सबाट विश्वबजारमा स्थापित गर्ने उच्च महत्त्वाकांक्षा बोकेको छ।
कर्णाली प्रदेशलाई फिल्म छायांकनको उत्कृष्ट गन्तव्यका रूपमा विकास गर्ने र सम्भावित छायांकन स्थलहरूको खोजी गर्ने यस अभियानलाई सरकारी तथा स्थानीय तहबाट बलियो साथ प्राप्त भएको छ। सल्यानका प्रतिनिधि सभा सदस्य रमेश मल्लको प्रमुख आतिथ्यमा सञ्चालित उक्त विशेष कार्यक्रममा कर्णाली प्रदेशका सामाजिक विकास मन्त्री घनश्याम भण्डारी, वन, वातावरण तथा उद्योग–पर्यटन मन्त्री सुरेश अधिकारी र फिल्म विकास बोर्डका अध्यक्ष दिनेश डिसीको उपस्थिति रहेको थियो। कार्यक्रममा बोल्दै बोर्ड अध्यक्ष डिसीले कर्णालीलाई अन्तर्राष्ट्रिय स्तरको सुटिङ हबका रूपमा उभ्याउन सम्पूर्ण सरोकारवाला निकायको एकीकृत र घनिभूत प्रयास अपरिहार्य रहेको औंल्याए।
यसैगरी, बनगाड कुपिण्डे नगरपालिकाका प्रमुख कर्णबहादुर बुढाथोकीले आफ्नो क्षेत्रमा छायांकनका लागि आउने जोकोही फिल्मकर्मी तथा प्राविधिक टोलीलाई स्थानीय सरकारले पूर्ण संरक्षण, समन्वय र सहयोग गर्ने दृढ प्रतिबद्धता व्यक्त गरे। प्रदेश सरकारले समेत कर्णाली प्रज्ञा प्रतिष्ठानमार्फत यस क्षेत्रमा सुटिङका लागि आउने निर्माताहरूलाई विशेष सहुलियत र प्रोत्साहन दिने नीति अघि सारिसकेको जानकारी दिइएको छ।
महोत्सवमा सहभागी फिल्म निर्माता, लेखक तथा निर्देशकहरूले कर्णालीको अद्भुत प्राकृतिक छटा र यहाँको मौलिक जनजीवन सिनेमाको कथावस्तुका लागि अत्यन्तै उर्वर भूमि भएको निष्कर्ष निकालेका छन्। फिल्मकर्मीहरू सन्तोष सेन, विकास सुवेदी र प्रेम पुरीलगायतको उपस्थिति रहेको यस महोत्सवमा पूर्व रजिष्ट्रार डा। महेन्द्र कुमार मल्लले सल्लाहकारको भूमिका निर्वाह गरे। यसै अवसरमा स्थानीय कलाकारहरू सपना शाही र संगीता बढुवाललगायतले पस्किएको बेजोड सांगीतिक तथा सांस्कृतिक प्रस्तुतिले महोत्सवको माहोललाई थप रोमाञ्चक र जीवन्त बनाएको थियो।
महोत्सवले सिनेमाको माध्यमबाट पर्यटन प्रवर्द्धन गर्ने मात्र नभई स्थानीय स्तरमा प्रत्यक्ष रोजगारी सिर्जना गर्ने र विश्वव्यापी चासोको विषय बनेको जलवायु परिवर्तनको असरबारे जनचेतना जगाउने दीर्घकालीन लक्ष्यसमेत तय गरेको छ। यसै वर्षदेखि नयाँ प्रतिभा र सिर्जनालाई लक्षित गर्दै ‘फिल्म कथा प्रतियोगिता’को समेत घोषणा गरिनुले कार्यक्रमको गरिमा झनै बढाएको छ।
रेडचेरी मिडियाको मूल आयोजना, नेपाल पर्यटन बोर्ड र स्थानीय तहको रणनीतिक सहकार्य तथा फिल्म विकास बोर्डको सक्रिय ऐक्यबद्धतामा यो महोत्सव सम्भव भएको हो। सुर्खेतको सफल उद्घाटनपछि पहिलोपटक कुपिण्डे दह जस्तो अनुपम प्राकृतिक सम्पदाको काखमा यति ठूलो स्तरको सिने–महोत्सव आयोजना हुँदा स्थानीय बासिन्दा, कलाप्रेमी र सम्पूर्ण सरोकारवालाहरूमा अभूतपूर्व उत्साह र आशाको सञ्चार भएको छ।
