काठमाडौं :
फिल्म ‘मितज्यू’को यतिबेला चर्चामा रहेको छ। यसैक्रममा फिल्म निर्देशक तथा समिक्षक नवीन सुब्बाले पनि फिल्म हेरेका छन्। उनले यस फिल्म ‘मितज्यू’ले विभिन्न लेयरमा समाजका भिन्न भिन्न पक्षलाई उजागर गरेको बताए। हालै राजनीतिक,सामाजिक,आर्थिक तथा पारिवारिक पक्षलाई एकसाथ ‘मितज्यू’ले देखाएको उनको भनाइ छ।
‘मितज्यू’ले गरेको राजनीतिक प्रेडिक अहिलेको नेपाली राजनीतिसँग मेल खाएको उनको तर्क छ।
“पुराना पार्टी समाप्त भएको र नयाँ सोच आएको कुरा सिनेमाले लाक्षणिक रुपमा देखाएको छ,” उनले भने, “चरित्र निर्माण गर्दाखेरि नै यो कुरा लिएर आएको छ ।”
नेपाली फिल्मले पहिलोपटक यसरी बोलेको आफूलाई महसुस भएको उनले बताए । पोलिटिकल इभेन्टलाई स्टोरीमा ढालेर चरित्रमार्फत सिम्बोलिक रुपमा राम्रोसँग उतार्ने काम भएको उनको भनाइ छ ।
नयाँ कलाकार भए पनि तेरियाले राम्रो काम गरेको भन्दै नवीनले प्रशंसा गरे । उनको डेब्यु सिनेमा जस्तो नलाग्ने उनको भनाइ छ। सौगात मल्ल र दयाहाङ राईसँगसँगै खारिएको काम देखाएको र यो फिल्म ‘मितज्यू’को अर्को उपलब्धी भएको उनले बताए। आवरण र इमोसनमा दयाहाङ र सौगातले पनि गज्जवको काम गरेको नवीनको भनाइ छ।
“यो फिल्मले धेरै च्यालेन्ज गरेको छ। हामीमा परिवारको जे कन्सेप्ट छ, त्यसलाई नै प्रश्न गरेको छ। यो लोकल स्टोरी उठाएर धेरै कुरा गरेको छ, भर्खरै खुलेको बाटो र जीपको कुरा छ,” उनले भने, “रोल्पा र रुकुमबाट अलि अगाडि बढेर समग्र नेपाली समाजको थर्ट प्रोसेसमाथि नै प्रश्न गर्छ । यो मलाई गज्जब लाग्यो ।”
यस्ता सिनेमा बन्नु पर्ने र धेरैले माया गर्नुपर्नेमा उनको जोड छ। यस्ता फिल्मलाई माया गर्दा अझै धेरै यस्ता फिल्म बन्ने र यसले समाज निर्माणलाई नै सहयोग गर्ने नवीनको तर्क छ। शुक्रबारबाट प्रदर्शनमा आएको फिल्ममा दयाहाङ राई, सौगात मल्ल र तेरिया मगर मुख्य भूमिका छन्।
यो फिल्ममा सौगात, दयाहाङ र तेरियासँगै खड्गबहादुर पुन मगर, शिशिर वाङ्देल, पुस्कर गुरुङ, राज थापा, सुवर्ण थापा, अनु थापा, स्मिता लामिछानेलगायतको अभिनय रहेको छ।
जीएम मुभिज प्रोडक्सनको ब्यानरमा निर्माण भएको फिल्म ‘मितज्यू’का लगानीकर्ता जनक घर्तीमगर हुन्। यो फिल्मलाई अनिल बुढा मगरले निर्देशन गरेका छन्। फिल्मलाई लोकेश बज्राचार्यले सम्पादन गरेका हुन्। शिशिर बिशंखेको सिनेमेटोग्राफी रहेको छ। यस फिल्मलाई आरआर फिल्म्सले नेपालभर वितरण गरेको छ।
