काठमाडौं,
नेपाल स्टक एक्सचेन्ज (नेप्से) परिसूचकमा बुधबार उल्लेख्य सुधार देखिएको छ। यो दिन बजार २१.३२ अंकले बढेर २६२१.२६ को विन्दुमा पुगेर बन्द भएको छ।
बजार बन्द हुँदाको अवस्थासम्म कूल ४ अर्ब १३ करोड १६ लाख रुपैयाँ बराबरको कारोबार भएको छ । उक्त कारोबारमा १ करोड १६ लाख कित्ता सेयर किनबेच भएका छन्।
आजको बजारमा खरिदकर्ता हाबी देखिएका छन्। बजारमा १८८ वटा कम्पनीको सेयर मूल्य बढेको छ भने ८० वटा कम्पनीको मूल्य घटेको छ। ९ वटा कम्पनीको मूल्यमा भने कुनै परिवर्तन आएको छैन।
आजको दिन कूल ३५४ वटा स्क्रीपको कारोबार भएको छ भने ३९ हजार १८३ पटकको कारोबारबाट उक्त नतिजा निस्किएको हो।
आजको बजारमा धेरै कमाउनेमा डिवेञ्चर तथा म्युचुअल फन्डको वर्चस्व रहेको छ । सर्वाधिक कमाउने कम्पनीहरूको सूचीमा सिद्धार्थ बैंकको डिवेञ्चर शीर्ष स्थानमा छ, जसको मूल्य १३.२१ प्रतिशतले बढेको छ।
आज कारोबार रकमका आधारमा कुमारी बैंक शीर्ष स्थानमा छ । बैंकको २६ करोड ४६ लाख रुपैयाँ बराबरको सेयर कारोबार भएको छ। त्यसैगरी, घलेम्दी हाइड्रोपावरको २१ करोड ६० लाख रुपैयाँ बराबरको कारोबार भएको छ ।
समूहगत रुपमा हेर्दा आज बैंक, विकास बैंक र निर्जीवन बीमा कम्पनीका सूचक एक प्रतिशत भन्दा धेरैले बढेका छन् । सबै समूहको सूचक सकारात्मक हुँदा बाँकी समूह भने एक प्रतिशत भन्दा कमले बढेको छ ।