सुचना, समाचार र मनोरन्जन

पोखरा–दुबई उडानमा आगमनतर्फ यात्रुको चाप बढी

पोखरा,
पोखरा र दुबईबीचको नियमित हवाई उडानबाट ५४ दिनको अवधिमा १४ हजार २ सय ६९ यात्रुले यात्रा गरेका छन् । फ्लाई दुबईले गत सेप्टेम्बर २३ देखि नोभेम्बर १५ सम्म सञ्चालन गरेको उडानमा दुवैतर्फ गरी उक्त संख्यामा यात्रु आवागमन भएको हो ।
Pach Pandav

पोखरा अन्तर्राष्ट्रिय विमानस्थलको तथ्यांकअनुसार यस अवधिमा दुबईबाट पोखरा आउने यात्रुको संख्या ८ हजार ७ सय ५६ रहेको छ । त्यस्तै, पोखराबाट दुबई जाने यात्रुको संख्या ५ हजार ५ सय १३ रहेको छ ।

तथ्यांकले दुबईबाट पोखरा आउने यात्रुको संख्या बाहिरिनेभन्दा ३ हजार २ सय ४३ बढी देखाएको छ । यसले पोखरा–दुबई हवाई सेवामा आगमनतर्फ यात्रुको आकर्षण बढी रहेको संकेत गरेको छ ।

उडान सुरु भएयता सेप्टेम्बर २५ मा मौसम प्रतिकूलताका कारण एक दिन उडान रद्द भएको थियो । त्यसबाहेक ५३ दिन नियमित रूपमा उडान सञ्चालन भएको विमानस्थलले जनाएको छ ।

पोखराबाट दुबईसँगको सिधा हवाई सम्पर्कले वैदेशिक रोजगारी, व्यवसाय तथा पर्यटनका लागि आवतजावत गर्ने यात्रुलाई सहज बनाएको छ । विशेषगरी विदेशबाट पोखरा आउने यात्रुको संख्या बढी देखिनुले अन्तर्राष्ट्रिय पर्यटक तथा नेपालीको आवागमनमा यो हवाई सेवाले सकारात्मक प्रभाव पार्न सक्ने अपेक्षा गरिएको छ ।

Leave A Reply

Your email address will not be published.