काठमाडौं :
बलिउड स्टार सलमान खानको बहुप्रतिक्षित फिल्म ‘ब्याटल अफ गलवान’ को छायांकन पूरा भएको छ। लद्दाखदेखि मुम्बईको मेहबुब स्टुडियोसम्म चलेको मुख्य सुटिङ टुंगिएकाे जानकारी सह–अभिनेता अनुपविक्रम शाहीले सामाजिक सञ्जालमार्फत सार्वजनिक गरेका हुन्।
फिल्ममा सलमान प्रमुख भूमिकामा देखिँदैछन् भने नेपाली अभिनेता अनुपविक्रम शाही खलनायकको रूपमा प्रस्तुत भएका छन्। भारतीय सञ्चारमाध्यमका अनुसार दुवै कलाकारबीच करिब १३ मिनेट लामो हाई–इम्प्याक्ट फाइट सिक्वेन्स छ, जसलाई फिल्मको आकर्षण मानिएको छ।
शाहीले सलमानसँगको सहकार्यलाई आफ्नो जीवनकै महत्वपूर्ण उपलब्धी बताउँदै उनलाई ‘सर्वकालिन महान’ (G.O.A.T.) को रुपमा वर्णन गरेका छन्। सलमानसँग काम गर्दा आफूले नजिकबाट ‘दयालु र औपचारिकताभन्दा बढी मानवीय’ अनुहार देखेको भन्दै शाहीले भावुक प्रतिक्रिया दिएका छन्।
फिल्म ‘ब्याटल अफ गलवान’ भारत–चीन विवादित सीमा क्षेत्रमा आधारित कथानकमा निर्माण भइरहेको छ। निर्माण पक्षले छायांकन पूरा भएको पुष्टि गरे पनि रिलिज मिति भने अझै सार्वजनिक गरेको छैन। सलमानको पछिल्लो वर्षका ठूला प्रोजेक्टमध्ये मानिएको यस फिल्ममा उनको एक्शन अवतार पुनः चर्चामा आउने अपेक्षा बलियो बनेको छ।