काठमाडौँ,
पर्यटकीय नगरी पोखरामा भोलिदेखि सञ्चालन हुने ‘टाइगर कप’ राष्ट्रियरअन्तर्राष्ट्रिय आमन्त्रित खुला क्लब च्याम्पियनशिप महिला तथा पुरुष भलिबल प्रतियोगिताको खेल तालिका सार्वजनिक गरिएको छ । आयोजक टाइगर ग्रुप अफ पोखराले पोखरा रङ्गशालामा रहेको भलिबल कोर्टमा प्रतियोगिताको खेलाउँदैछ ।
आयोजकले हिजो सार्वजनिक गरेको तालिकाअनुसार प्रतियोगिताको उद्घाटन खेलमा पुरुषतर्फ गण्डकी प्रदेश भलिबल सङ्घ र सशस्त्र प्रहरीको एपिएफ क्लबबीच खेल हुनेछ । प्रतियोगिताको पहिलो दिन तीन खेल हुनेछ ।
पुरुषतर्फ पहिलो खेल पाहुना टोली मालदिभ्स र नेपाल आर्मी क्लबकाबीच हुनेछ भने महिलातर्फ न्यू डायमण्ड र नेपाल आर्मी क्लबबीच खेल हुनेछ । माघ १७ गतेसम्म सञ्चालन हुने प्रतियोगितामा पुरुषतर्फ ६ र महिलातर्फ पाँच गरी ११ टिमको सहभागिता रहेको टाइगर ग्रुप अफ पोखरा नेपालका अध्यक्ष नारायण शर्माले जानकारी दिए ।
प्रतियोगितामा पुरुषतर्फ तीन विभागीय टोली नेपाल आर्मी क्लब, नेपाल पुलिस क्लब र एपिएफ क्लब, गण्डकी प्रदेश भलिबल सङ्घ, पर्वत जिल्ला भलिबल सङ्घ र मालदिभ्स भलिबल एशोसिएसन क्लबको सहभागिता रहेको छ ।
त्यस्तै महिलातर्फ तीन विभागीय टोली नेपाल आर्मी क्लब, नेपाल पुलिस क्लब र एपिएफ क्लबसहित टिपटप न्यू डायमण्ड युथ स्पोट्र्स क्लब र थाइल्याण्ड क्विन्सको सहभागिता रहेको छ । छैटौँ संस्करणको उपाधि जित्ने महिला तथा पुरुष टोलीले समान ६ लाख ६६ हजार ६ सय ६६ रुपैयाँ, ट्रफी र मेडल पुरस्कार प्राप्त गर्नेछन् । उपविजेताले नगद ३ लाख ६६ हजार ६ सय ६६ रुपैयाँ तथा तेस्रो हुने टोलीले नगद १ लाख ६६ हजार ६ सय ६६ रुपैयाँ प्राप्त गर्ने अध्यक्ष शर्माले बताए ।
यसैगरी, सर्वोत्कृष्ट खेलाडीले नगद २६ हजार ६ सय ६६ प्राप्त गर्दा अन्य विद्यागत महिला तथा पुरुष उत्कृष्ट हुने खेलाडीले समान नगद ११ हजार ६ सय ६६ का साथमा ट्रफी र प्रमाणपत्र प्राप्त गर्नेछन् । पाँचौँ संस्करणको टाइगर कपमा पुरुषतर्फ नेपाल पुलिस क्लबले जितेको थियो भने महिलातर्फ आयोजक टोली टाइगर ग्रुपले पहिलो पटक उपाधि जितेको थियो ।