काठमाडौं :
यतिबेला अष्ट्रेलियाको भिक्टोरियास्थित वाल्हालामा हलिउड फिल्म ‘आइस रोड २’को धमाधम छायांकन भइरहेको छ। यो हलिउड फिल्मको विदेशमा नै छायांकन हुँदा नेपालमा चर्चाको विषय बनेको छ। यो फिल्मको छायांकन हुँदा नेपालमा चर्चाको विषय बन्नुमा नेपालको पहिचान र संस्कृति झल्किने गरी तयार गरिएको सेटले गर्दा हो।
त्यहाँको सेटबाट बाहिरिएका तस्विरहरु हेर्ने हो भने नेपालका सडकदेखि घर र होटलसम्मको परिवेश झल्काइएको छ। नेपालको हिमाली भेगको झल्को दिने गरि सेट निर्माण गरिएको र नेपाल पुलिस लेखिएको केही भ्यान र नेपालको झण्डा इंकित एक बस समेत राखिएको तस्विर बाहिरिएपछि नेपाली दर्शकको चासो बढेको हो।
आइतबार सार्वजनिक भएको तस्विरमा फिल्मका मुख्य अभिनेता लियाम नीसनसहितलाई देख्न सकिन्छ। लियाम नेपाल प्रहरीको पोशाकमा रहेका व्यक्तिसँग लडाइँ गरिरहेको देखिन्छ । प्रहरीको भूमिकामा रहेका कलाकार भने रुपरंगले नेपाली जस्तै देखिएका छन् । उनी खुकुरी क्रस र तारा पोशाकमा देखिएपछि नेपाली दर्शकमाझ कौतुहलता जगाएको हो।
अन्तराष्ट्रिय समाचार एजेन्सीका अनुसार फिल्ममा लियामसँगै अष्ट्रेलियन स्टार बर्नार्ड करी, ज्योफ मोरेल, ग्रेस ओसुलिवानको पनि मुख्य भूमिका रहेको छ । यो फिल्म सन् २०२१ मा आएको ‘आइस रोड’को सिक्वेल हो ।