सुचना, समाचार र मनोरन्जन

एसियाका उत्कृष्ट २५ गन्तव्यमा पोखरा ११औँ स्थानमा

लोन्ली प्लानेटको सन् २०२७ को सूचीमा पोखरा, अन्तर्राष्ट्रिय पर्यटन पहिचानलाई आर्थिक लाभमा रूपान्तरण गर्नुपर्नेमा जोड

पोखरा,

अन्तर्राष्ट्रिय यात्रा प्रकाशन संस्था लोन्ली प्लानेटले सन् २०२७ मा एसियामा घुम्न सिफारिस गरेका उत्कृष्ट २५ गन्तव्यको सूचीमा नेपालको पोखरा ११औँ स्थानमा परेको छ ।

नोभेम्बर १५, २०२६ मा प्रकाशित ‘२५ बेस्ट प्लेसेस टु भिजिट इन एसिया इन २०२७’ शीर्षकको सूचीमा पोखरा एसियाका चर्चित पर्यटकीय गन्तव्यसँगै समेटिएको हो ।

लोन्ली प्लानेटको सूचीमा जापानको ओकिनावा पहिलो, चीनको चेङ्दु दोस्रो र भारतको गुजरात तेस्रो स्थानमा छन् । त्यसैगरी भियतनामको दानाङ चौथो र लाओसको लुआङ प्राबाङ पाँचौँ स्थानमा रहेका छन् ।

सूचीमा भारतको जयपुर १०औँ, नेपालको पोखरा ११औँ र श्रीलंकाको एल्ला १२औँ स्थानमा छन् ।

लोन्ली प्लानेटले पोखरालाई व्यस्त सहरी जीवनबाट टाढा रहेर आराम र पुनर्ताजगी लिन सकिने गन्तव्यका रूपमा चित्रण गरेको छ । फेवातालको किनारमा अवस्थित पोखराबाट देखिने हिमशृङ्खला, प्राकृतिक सौन्दर्य र शान्त वातावरणलाई यसको प्रमुख आकर्षणका रूपमा उल्लेख गरिएको छ ।

विशेषगरी अन्नपूर्ण क्षेत्रको पदयात्रा पूरा गरेर फर्किने पर्यटकका लागि पोखरा विश्राम गर्ने, अनुभव साटासाट गर्ने र नयाँ ऊर्जा प्राप्त गर्ने उपयुक्त गन्तव्य रहेको प्रकाशनले जनाएको छ ।

Pach Pandav

तालमा डुङ्गा विहार, सराङकोटबाट प्याराग्लाइडिङ, जलयात्रा, मन्दिर, बजार, क्याफे तथा पारिवारिक होमस्टेले पोखराको पर्यटन अनुभवलाई थप विविध बनाउने लोन्ली प्लानेटको उल्लेख छ ।

नेपाल पर्यटन बोर्डले पनि पोखरालाई हिमाल, ताल र हरियालीको अनुपम संयोजन भएको गन्तव्यका रूपमा प्रस्तुत गर्दै आएको छ । अन्नपूर्ण हिमशृङ्खलाको पृष्ठभूमिमा रहेका फेवा, रूपा र बेगनास ताल, विश्वशान्ति स्तूप, तालबाराही मन्दिर तथा साहसिक पर्यटनका गतिविधि पोखराका प्रमुख आकर्षण हुन् ।

नेपाल पर्यटन बोर्डका कार्यकारी सदस्य सन्तोष पोखरेलले लोन्ली प्लानेटको सूचीमा पोखरा समेटिनु अन्तर्राष्ट्रिय पर्यटन पहिचान विस्तारका लागि सकारात्मक अवसर भएको बताए ।

अन्तर्राष्ट्रिय प्रकाशनमा स्थान पाएको यस अवसरलाई प्रतिफलमुखी बनाउन वास्तविक पर्यटक आगमन, पर्यटकको बसाइ अवधि र स्थानीय अर्थतन्त्रमा पर्यटनको योगदान वृद्धिसँग जोड्नुपर्ने उनको भनाइ छ ।

पोखरा पर्यटन परिषद्का अध्यक्ष हरि भुजेलले पोखरालाई अन्नपूर्ण क्षेत्रको पदयात्रामा जाने र फर्किने पर्यटकको विश्रामस्थलमा मात्र सीमित नराख्नुपर्ने बताए ।

पोखरालाई संस्कृति, प्रकृति, साहसिक गतिविधि, स्थानीय उत्पादन र समुदायमा आधारित पर्यटनसँग जोड्न सके अन्तर्राष्ट्रिय पहिचानलाई दिगो आर्थिक लाभमा रूपान्तरण गर्न सकिने उनले बताए ।

लोन्ली प्लानेटको सूचीमा पोखरा समेटिनुले नेपालको पर्यटन प्रवर्द्धनका लागि नयाँ अवसर सिर्जना गरेको छ । अब यस अवसरलाई पर्यटकको आगमन वृद्धि, लामो बसाइ, स्थानीय उत्पादनको प्रवर्द्धन र पर्यटनबाट स्थानीय समुदायले प्राप्त गर्ने लाभसँग जोड्नु आवश्यक देखिन्छ ।

Leave A Reply

Your email address will not be published.