काठमाडौं/
सरकारले रातो बाँदरलाई कृषि हानिकारक वन्यजन्तुमा सूचीकृत गर्ने तयारी गरेको छ ।
प्रतिनिधि सभाको कृषि, सहकारी तथा प्राकृतिक स्रोत समितिमा वन्यजन्तुले पारेको मानवद्वन्द्ध र कृषिबालीमा पुगेको क्षतिको विषयमा भएको छलफलमा वनमन्त्री ऐनबहादुर शाहीले रातो बाँदरलाई कृषि हानिकारक वन्यजन्तुको रूपमा सूचीकृत गर्ने तयारी रहेको बताए ।
वन्यजन्तुले कृषिबालीमा क्षति पुर्याएर गाउँ नै रित्तिनै अवस्था आएपछि देशभरिका किसानहरु अहिले चिन्तित छन् ।
कृषि क्षेत्रका सरोकारवाला र स्थानीय तहहरूले वन मन्त्रालय, कृषि मन्त्रालय र कृषि समितिमा पटक(पटक ध्यानाकर्षण गराउँदै आइरहेका थिए ।
समितिमा भएको छलफलमा रातो बाँदरलाई कृषि हानिकारक वन्यजन्तुमा सूचीकृत गराउने तयारीबारे मन्त्रालयले समितिलाई ब्रिफिङ गरेको हो ।
सरकारले यस अगाडि मंसिर २०८० मा बँदेललाई पनि कृषि हानिकारक वन्यजन्तु घोषणा गरेको थियो ।