काठमाडौं :
दीपाश्री निरौलाको निर्देशनमा निर्माण भएको फिल्म ‘छक्का पञ्जा–५’को गीत प्रमोसनल गीत ‘बिहे भाको छैन’ले ३१ लाख भन्दा बढि दर्शक पाएको छ। युट्युबमा अपलोड भएको दुई साता हुनै लाग्दा यतिधेरै भ्युअर्स बटुलेको हो।
यो समाचार तयार पार्दासम्म यो गीतलाई ३१ लाख ८४ हजार भन्दा बढि दर्शकले हेरेका छन् भने ५३ हजारले लाइक गरेका छन्। २६ सय भन्दा बढिले फिल्मको गीतका बारेमा आ आफ्नो धारणा राखेका छन्। पछिल्लो समयकी चर्चित गायिका बेनिशा पौडेल र सविन सुबेदीले गाएको यस गीतमा संगीत दीपक शर्माको छ। फिल्मका मुख्य अभिनेता दीपकराज गिरीले नै लेखेको यो गीतमा उनी आफै नाचेका छन्। उनलाई वर्षा शिवाकोटीले डान्समा साथ दिएकी छन्।
सविन सुवेदी र बेनिशा पौडेलको स्वर रहेको गीतमा दीपकराज गिरी र दीपक शर्माको शब्दरचना छ । संगीत दीपक शर्माले गरेका छन् ।
आगामी असोज २४ गते रिलिज हुने यो फिल्ममा दीपक र वर्षासँगै केदार घिमिरे, निर्मल शर्मालगायत कलाकार छन्। निर्माण पक्षले यो फिल्मका अन्य कलाकार को–को रहेका छन् भन्ने बारेमा भने जानकारी दिएका छैनन्।
आमा सरस्वती मुभिज र आएमईको प्रस्तुतिमा निर्माण भएको चलचित्रका कार्यकारी निर्माता केदार घिमिरे (माग्ने बुढा) र निर्मल शर्मा हुन् ।अभिनेता समेत रहेका निर्माता दीपकराज गिरीको पटकथा रहेको फिल्मको कथा र संवाद दीपक, केदार र दीलिप तामाङले लेखेका हुन्।
हरि हुँमागाईको डीओपी, उत्तम हुँमागाईंको छायांकन, रोशन श्रेष्ठको द्धन्द्व निर्देशन, कपिल पराजुलीको कलर रहेको फिल्ममा विपीन मल्लको सम्पादन छ। फिल्मलाई श्री ब्यंकटेस इन्टरटेनमेन्ट र माता पाथिभार फिल्मसले वितरण गर्दैछन् ।