काठमाडौं :
शंकर घिमिरेको लेखन तथा निर्देशनमा बनेको फिल्म ‘तेल भिसा’को दोस्रो गीत ‘तुकुनको मुकुन मन पर्या’सार्वजनिक भएको छ। बिहीबार निर्माण टिमले युट्युबमार्फत गीतको भिडियो रिलिज गरेका हुन्।
गीतको भिडियोमा फिल्मका मुख्य कलाकार विपिन कार्की, पुजा चन्द, बुद्धि तामाङ र जाहन्वी बस्नेतले नाचेका छन्। यो गीतमा कृष्ण भारद्धाजको संगीत, राजन इशानको एरेञ्ज तथा निर्विकल्पम, कृष्ण भारद्धाज, शंकर अधिकारी घायल र नवीन बिकको शब्द रचना र शान्तिश्री परियार र साइराज खत्रीको स्वर रहेको छ। गीतको भिडियो रिलिज भएपछि यतिबेला कमेन्टकर्ताले अडियो तथा भिडियो उत्कृष्ट बनेको प्रतिक्रिया दिएका छन्।
आगामी मंसिर ७ गतेबाट प्रदर्शनको तयारीमा रहेको फिल्ममा विपिन कार्कीको बृद्ध र जवानगरी दोहोरो भुमिका हेर्न पाइने निर्माण पक्षको भनाई छ। केहि दिन अघि सार्वजनिक पोस्टरमा कलाकार कार्कीलाई दुवै अवस्थामा प्रस्तुत गरिएको थियो। यो फिल्ममा विपिनसँगै वर्षा राउत, पुजा चन्द, ऋचा घिमिरे, बुद्धि तामाङ, सुचित्रा उप्रेती र विदेशी कलाकारहरुको पनि अभिनय रहेको छ ।
वेलडन क्रियसनको व्यानरमा ऋचा घिमिरेको प्रस्तुती रहेको सिनेमामा अनिल पाण्डे र शिवराज कार्कीको लगानी छ। प्रिन्स युवराज कार्की र श्रुती दाहाल कार्यकारी निर्माता रहेको सिनेमामा सुशन प्रजापतिको छायांकन, रामजी लामिछाने र शिशिर खातीको कोरियोग्राफी, आशिष अविरल, कल्याण सिंह र कृष्ण भारद्धाजको संगीत र अजय खड्काको सम्पादन छ ।