पोखरा/
पर्यटन व्यवसायी महिला संघ नेपाल (टेवान) पोखराले ४५औं विश्व पर्यटन दिवसको पूर्वसन्ध्यामा पोखराको लेकसाइड र आसपासका चौतारीहरूको सरसफाइ कार्यक्रम सम्पन्न गरेको छ। पोखरा महानगरपालिका वडा नं ७ का अध्यक्ष राममोहन आचार्यको प्रमुख आतिथ्यतामा कार्यक्रम सफलतापूर्वक सम्पन्न भएको छ।
टेवानकी अध्यक्ष कमला गिरीको नेतृत्वमा सञ्चालित यस कार्यक्रमले पोखरालाई स्वच्छ, हरियाली, र पर्यटकीय रूपमा आकर्षक बनाउने अभियानलाई थप ऊर्जा प्रदान गरेको छ। टेवानले सामाजिक उत्तरदायित्वको भावना अनुरूप निरन्तर यस्ता सरसफाइ अभियान गर्दै आएको छ, जसले पोखरालाई पर्यटनको केन्द्रविन्दु बनाउन सघाउ पुर्याएको छ।
कार्यक्रममा टेवानका पदाधिकारी, सदस्यहरू, र प्राध्यापक दीपेन्द्र पहारीको उपस्थिति रहेको थियो। कार्यक्रमले स्थानीय व्यवसायीहरू, सरकार, र नागरिकलाई पोखराको सफाइ र संरक्षणमा योगदान पुर्याउन प्रेरित गरेको छ।
टेवानकी अध्यक्ष कमला गिरीले कार्यक्रम सफलतापूर्वक सम्पन्न गर्न सहयोग गर्ने सबैलाई धन्यवाद ज्ञापन गर्दै आगामी दिनमा पनि यस्ता अभियानलाई निरन्तरता दिने प्रतिबद्धता व्यक्त गरिन्।
पोखरा महानगरपालिका वडा नं ७ का अध्यक्ष राममोहन आचार्यले टेवानको यो सरसफाइ अभियानको प्रशंसा गर्दै यसले पोखरालाई अझ सुन्दर बनाउन महत्त्वपूर्ण योगदान गरेको बताए। कार्यक्रममा सहभागी सबैलाई धन्यवाद व्यक्त गर्दै उनले यसप्रकारका गतिविधिले पोखरालाई स्वच्छ र आकर्षक बनाउने पहललाई बल पुर्याउने विश्वास व्यक्त गरे।
पोखरालाई हरियाली र पर्यटकीय रूपमा अझ सुन्दर बनाउन टेवानले गरेको यो प्रयास सराहनीय रहेको छ।