काठमाडौं :
आगामी दशैंको फूलपातीदेखि प्रदर्शनमा आउन लागेको नेपाली फिल्म ‘माइतीघर’को शीर्ष गीत ‘वसन्त नै बस्न खोज्छ यहाँ लोलाएर’ सार्वजनिक गरिएको छ। ६ दशकअघि निर्माण भएको सोही नामको फिल्मबाट लिइएको गीतलाई निर्माता रोहित अधिकारी र उनको टिमले नयाँ ढंगमा पुनः प्रस्तुत गरेका हुन्।
गीतमा किरण खरेलको शब्द, जयदेवको संगीत र राकेश गुरुङको संगीत संयोजन (एरेञ्ज) रहेको छ। मूल गीतमा स्वर दिएकी गायिका आशा भोसलेको स्थान यसपटक भारतीय गायिका सञ्जीवनीले लिएकी छन्।
गीतको भिडियोमा निर्देशक कविराज गहतराजको कोरियोग्राफीमा उपासना सिंह ठकुरी र श्यामाश्री शेर्पाले नृत्य गरेका छन्। मानकृष्ण महर्जन र सुशन प्रजापतिको छायांकन रहेको भिडियो सार्वजनिकसँगै निर्माण टिमले भिडियो प्रतियोगिताको घोषणा गरेको छ।
४० सेकेन्डदेखि २ मिनेटसम्मको भिडिओ बनाइ पठाउनेमध्ये उत्कृष्ट एक जनालाई ५ लाख रुपैयाँ पुरस्कार प्रदान गरिने बताइएको छ। निर्माण टिमले यस रणनीतिलाई प्रचार–प्रसारको नयाँ माध्यमको रूपमा प्रयोगमा ल्याउने लक्ष्य राखेको छ।
मिलन तामाङ निर्देशित फिल्ममा उपासना र श्यामाश्रीसँगै केदार प्रसाद घिमिरे (माग्ने बुढा), धीरज मगर, प्रकाश सपूत, युवराज लामा, बुद्धि तामाङ, रजनी गुरुङ लगायत कलाकारको अभिनय रहेको छ। चलचित्रमा रबिन शेरचन र धीरज तामाङको लगानी, कार्यकारी निर्मातामा ईश्वर श्रेष्ठ र निरज कटुवाल, र लेखकमा रामशरण पाठक रहेका छन्।