काठमाडौं :
नेपालका प्रथम राष्ट्रपति डा. रामवरण यादवले फिल्म ‘बिगुल’ हेर्नुभएको छ । नेपाली समाजमा मौलाउँदै गएको भ्रष्टाचार, राजनीतिक विकृति, प्रशासनिक बेथिति र सामाजिक विसंगतिविरुद्ध आवाज उठाएको फिल्म ‘बिगुल’को मंगलबार राजधानीमा विशेष प्रदर्शन गरिएको हो ।
विशेष प्रदर्शनमा पूर्वराष्ट्रपति डा. यादव, पूर्वप्रधानमन्त्री माधवकुमार नेपाल, नेपाली कांग्रेसका महामन्त्री गगन थापा, पूर्वमन्त्री प्रदीप पौडेल, सांसद अर्जुननरसिंह केसीलगायत विशिष्ट व्यक्तित्वहरूको उपस्थिति रहेको थियो ।
फिल्म हेरेपछि पूर्वराष्ट्रपति डा. यादवले यथार्थलाई कलात्मक ढंगले प्रस्तुत गरिएको भन्दै ‘बिगुल’ समाज परिवर्तनको प्रभावकारी माध्यम बन्न सक्ने विश्वास व्यक्त गरे ।
पूर्वप्रधानमन्त्री माधवकुमार नेपालले धेरै समयपछि हलमा पुगेर नेपाली फिल्म हेरेको उल्लेख गर्दै देशको वास्तविकता बोल्ने फिल्म भनेर सुनेपछि आफू हलसम्म आएको बताए ।
“धेरै वर्षपछि हलमा आएर नेपाली चलचित्र हेरेको हुँ । देशको यथार्थ बोल्ने फिल्म भनेर सुनेपछि हेर्न आएको हुँ । वास्तवमै ‘बिगुल’ अत्यन्त उत्कृष्ट, यथार्थवादी र सन्देशमूलक फिल्म रहेछ,” उनले भने ।
त्यस्तै, गगन थापाले ‘बिगुल’लाई परिवर्तनको ऐना भएको टिप्पणी गर्दै यो फिल्मले युवा पुस्तालाई सोच्न बाध्य बनाउने र समाज रूपान्तरणको अभियानलाई थप बल पुर्याउने विश्वास व्यक्त गरे ।
“यो केवल मनोरञ्जनका लागि बनेको फिल्म होइन, देशको यथार्थ बोल्ने चलचित्र हो,” उनले भने ।
विशेष प्रदर्शनमा उपस्थित विशिष्ट तथा बौद्धिक व्यक्तित्वहरूले पनि फिल्मले उठाएको विषयवस्तु, प्रस्तुतिकरण र सन्देश निकै प्रभावकारी रहेको प्रतिक्रिया दिएका थिए ।
दिनेश कोइरालाको कथा तथा निर्माण रहेको ‘बिगुल’ रमेश कोइरालाको निर्देशनमा बनेको हो । जेन्जी आन्दोलनको माहोल बन्नुअघि नै निर्माण गरिएको फिल्मले देखाएको राजनीतिक अस्थिरता, राज्य संयन्त्रभित्रको अव्यवस्था र जनआक्रोश अहिलेको नेपालको अवस्थासँग आश्चर्यजनक रूपमा मेल खाने दर्शकहरूको प्रतिक्रिया थियो । धेरैले यसलाई “समयभन्दा अगाडि बनेको चेतनाको आवाज” भनेर टिप्पणी गरेका छन् ।
अधिकांश अतिथिहरूले ‘बिगुल’लाई नेपालको वर्तमान अवस्थाको निर्भीक र यथार्थ चित्रण गर्ने साहसी फिल्मका रूपमा व्याख्या गरेका छन् । फिल्मले समाजमा जरा गाडेर बसेको भ्रष्टाचार, राजनीतिक स्वार्थ, प्रशासनिक विकृति र जनताले भोगिरहेका पीडालाई स्पष्ट रूपमा प्रस्तुत गरेको भन्दै खुलेर प्रशंसा गरिएको थियो ।
विशेष प्रदर्शनमा सहभागी बुद्धिजीवी, कलाकार, सञ्चारकर्मी तथा सामाजिक अभियन्ताहरूले पनि ‘बिगुल’ले नयाँ बहस सिर्जना गर्ने बताएका छन् । अहिलेको पुस्ताले खोजिरहेको यथार्थवादी सिनेमा ‘बिगुल’ भएको प्रतिक्रिया धेरैले दिएका थिए ।
कथाकार तथा निर्माता दिनेश कोइरालाले समाज परिवर्तनको उद्देश्यसहित फिल्म निर्माण गरिएको बताए । “‘बिगुल’ कुनै व्यक्ति वा दलविरुद्ध नभई देशमा मौलाएको विकृति, अन्याय र भ्रष्ट प्रवृत्तिविरुद्ध उठाइएको कलात्मक आवाज हो,” उनले भने, “फिल्म समाजको ऐना हो, र ‘बिगुल’ले यही ऐनामा आजको नेपालको अनुहार देखाएको छ ।”
आगामी जुन २६ देखि फिल्म अष्ट्रेलियाका विभिन्न शहरहरूमा पनि प्रदर्शन गरिने तयारी गरिएको छ। नेपालमा पुनः रिलिजको मिति भने केही समयपछि तय गरिने निर्माण टिमले जनाएको छ ।
गत निर्वाचनभन्दा केही दिनअघि अर्थात् १ फागुनमा प्रदर्शनमा आएको फिल्म चार दिनमै हलबाट हटाइएको थियो। फिल्ममा बेनीशा हमाल, नरेन खड्का, जेएन घिमिरे, हेमन्त बुढाथोकी, विनोद न्यौपाने, मीरा पण्डित, मान्सी शर्मा, रबिन्द्र खड्कालगायत कलाकारहरूको अभिनय रहेको छ।