काठमाडौं :
बिहिबारबाट चलेको ‘नेपाल कल्चरल इन्टरनेशनल फिल्म फेस्टिभल’ (एनसिआईएफएफ)को छैटौँ संस्करण सम्पन्न भएको छ। तीनदिनसम्म काठमाडौंमा जारी रहेको फिल्म फेस्टिभल समापन भएको हो।
सूचना सञ्चार तथा प्रविधि मन्त्री पृथ्वी सुब्बा गुरुङको प्रमुख आतिथ्यतामा शनिबार बेलुका चलचित्र विकास बोर्डमा विभिन्न उत्कृष्ट विधामा अवार्ड प्रदान गर्दै यो अवार्ड सम्पन्न भएको हो। यो महोत्सव नेपाल संस्कृति तथा चलचित्र केन्द्रको आयोजना र चलचित्र विकास बोर्डको सह–आयोजनामा सुरु भएको थियो। महोत्सवमा यस पटक ४७ देशका ९८ वटा फिल्महरू अन्तिम प्रतिस्पर्धामा उत्रिएका थिए। यि सबै फिल्मलाई महोत्सवमा प्रदर्शन गरिएको थियो।
महोत्सवमा अन्तराष्ट्रिय प्रतिस्र्धा तर्फ सर्वोत्कृष्ट अन्तराष्ट्रिय फिल्मको अवार्ड भारतबाट पुभुले हाँसिल ग¥यो। फिल्म पुभुबाटै उत्कृष्ट अन्तराष्ट्रिय अभिनेताको अवार्ड मन्जुलन केभीले हाँसिल गरे भने उत्कृष्ट फिचर फिल्म निर्देशकको अवार्ड अमेरिकाको फिल्म ‘ला’ फोर्सबाट जी ओभानी एम जेल्कोले हाँसिल गरे। यस्तै फिचर तर्फ नै उत्कृष्ट अभिनेत्रीको अवार्ड जर्मनीबाट फिल्म इम्पियोरबाट अभिनेत्री युनिस कचीरुवाले आफ्नो पोल्टामा पार्न सफल भइन्।
यसैगरी यो महोत्सवमा अन्तराष्ट्रिय लघु फिल्मको अवार्ड बंगलादेशको सर्ट फिल्म ‘सौदा’बाट फकिर जिप्लवले, उत्कृष्ट महिला फिल्मको अवार्ड रसियाको फिल्म ‘द रि युनियन’बाट लोलिता नारान ओभिचले, बाल चलचित्रको अवार्ड भियतनामको फिल्म ‘लस्ट फर फ्रिडम’बाट जाकुभ जाजाकले हाँसिल गरे। अन्तराष्ट्रिय बृत्तचित्रको अवार्ड क्यानडाको फिल्म नुरागा भूमिबाट डानियल खान डा लिल्भाले, इन्भारोमेन्टल फिल्मको अवार्ड स्पेनको फिल्म ‘द सोल अफ ज्यास्मिन’बाट मरिना गार्सिया एन्ड्युले, अन्तराष्ट्रिय मानव अधिकार फिल्मको अवार्ड अमेरिकाको अमेरिकन फुल ब्रोडबाट क्रिस्टिना होडेलले हाँसिल गरे।
यस्तै एनिमेसन फिल्मको अवार्ड साउथ अफ्रिकाको फिल्म फ्लावर अफ दि पार्टिसनबाट चार्लेस बाडेनहोस्टले, अन्तराष्ट्रिय छायांकारको अवार्ड स्पेनको फिल्म स्पिक सन लाइटबाट जसी लुईस अल्कानीले, उत्कृष्ट चलचित्र स्कृप्टको अवार्ड इटालीको फिल्म आउट डियरबाट ऐस्यान्डो लियोनीले, जुरी मेन्सन अवार्ड अर्जेन्टिनाको फिल्म द टेम्पल अफ इन्टरनल साउन्डबाट जर्ज क्याराभोटाले, स्पेशन मेन्सन अवार्ड बेलायतको फिल्म लकडाउन गर्डेन डायरीबाट एड्रिना उलिकले प्राप्त गरे। यस्तै पपुलर अवार्ड जर्मनीको फिल्म सिड वीथ मीबाट अकिफा मियानले, इन्करेजमेन्ट अवार्ड नेपालको फिल्म जाईन पपेट्स फर डिज्निफाईड मेन्सुरेसनबाट ओडिटी लारामीले हाँसिल गरे।
महोत्सवमा अन्तराष्ट्रिय तर्फ आठ जना विदेशी निर्णायकहरू छन्। अन्तर्राष्ट्रिय निर्णायकमा भारतबाट फिल्म निर्देशक निपोन धौला, जर्मनी फिल्मकर्मी फाविन मात्थियस र फिल्मकर्मी इभिन बिराजी, बेलायतबाट फिल्म लेखक तथा निर्देशक लुईसा प्रिटोलानी, क्यानडाबाट चलचित्र निर्देशक जुडी ग्लाड्स्टोन, इरानबाट अभिनेत्री, लेखक तथा निर्देशक तिमा टाघिजादेह, बहराइनबाट चलचित्र निर्माता निर्देशक एवम् लेखक इभा दाउद र रुसबाट फिल्मकर्मी इरिना बेराजी रहेका छन्।
अवार्ड समारोहमा सञ्चारमन्त्री पृथ्वी सुब्बा गुरुङसहित चलचित्र विकास बोर्डका अध्यक्ष दिनेश डिसी, अग्रज संगीतकार एवम् महोत्सवका राष्ट्रिय तर्फ निर्णायक प्रमुख शम्भुजीत बासकोटा, नेपाली र विदेशी निर्णायकहरु, अग्रज अभिनेत्रीहरु बसुन्धरा भुसाल, भुवन चन्द, चैत्यदेवी सिंहले लगायतले बिजेताहरुलाई अवार्ड प्रदान गरे ।
यो महोत्सवमा राष्ट्रिय प्रतिस्पर्धामा उत्कृष्ट चलचित्रको अवार्ड बुलाकीले चुम्यो भने उत्कृष्ट निर्देशकको अवार्ड चलचित्र पुजार सार्कीबाट दिनेश राउतले आफ्नो पोल्टामा पारे । पुजार सार्कीबाटै उत्कृष्ट अभिनेताको अवार्ड आर्यन सिग्देलले र उत्कृष्ट अभिनेत्रीको अवार्ड अञ्जना बराईलीले जिते। यताचलचित्र तर्फ नै उत्कृष्ट छायाँकारको अवार्ड फिल्म बुलाकीबाट शिव ढकाललेले जिते भने यसैफिल्मबाट नै इन्करेजमेन्ट अवार्ड अभिनेता नरेन खड्काले पाए। यता उत्कृष्ट स्कृप्टको अवार्ड फिल्म ‘पखेटा’बाट सनोल दासले हाँसिल गरे।
यस्तै राष्ट्रिय प्रतिस्पर्धामा उत्कृष्ट लघु चलचित्रको अवार्ड ‘रित्तो गाउँ’बाट रामजी ज्ञवाली, बृत्तचित्रको अवार्ड नो मोनास्ट्री नो भिलेजबाट टासी ल्हाजोमले, महिला चलचित्रको अवार्ड पिरियडबाट रेवती गुरुङले, बाल चलचित्रको अवार्ड द स्कुल वालबाट मोहन श्रेष्ठले कल्चरल चलचित्रको अवार्ड चिपागु निलाबाट योवन शाक्यले, जुरी मेनसन अवार्ड चलचित्र छेसाङबाट रजिला श्रेष्ठले, स्पेशल मेनसन अवार्ड सर्ट फिल्म थ्रेसोल्डबाट सरिता शाहले र पपुलर अवार्ड चलचित्र लेट नाईटबाट ओविन उद्दिनले जिते।
राष्ट्रिय प्रतिस्पर्धाको निर्णायकमा वरिष्ठ संगीतकार तथा चलचित्र विकास बोर्डका पूर्व अध्यक्ष शम्भुजीत बास्कोटा,अभिनेत्री मिथिला शर्मा, अभिनेता प्रदीप खड्का, अभिनेत्री सुरक्षा पन्त, फिल्म निर्देशक दीपेन्द्र के. खनाल, फिल्म निर्माता एवम् निर्देशक रौनक विक्रम कँडेल, निर्देशक दिनेश लिङदेन र टेलिभिजनकर्मी टिकाराम यात्री थिए। सञ्चारमन्त्री पृथ्वी सुब्बा गुरुङले समापन समारोहलाई सम्बोधन गर्दै फिल्म विकास र विस्तामा यस्तो महोत्सव निकै उपयोगी हुने विश्वास आफुले लिएको बताए। उनले सबै विदेशी अतिथिहरुलाई भगवानको रुपमा आफुहरुले लिने गरेको भन्दै आउँदो वर्षहरुमा पनि महोत्सवमा सहभागी हुन विदेशीहरुलाई अनुरोध गरे।
महोत्सवका अध्यक्ष एवम् निर्देशक सन्तोष सुवेदीले समापन समारोहमा सबैलाई धन्यबाद ज्ञापन गरे। उनले नेपालमा महोत्सव आयोजना गर्न निकै गाह्रो हुने गरेको बताए। यो महोत्सवलाई राज्यले थप सहयोग गरेमा आउँदो वर्ष अझ बृहत रुपमा आयोजना गर्ने पनि उनले बताए।
यस्तै चलचित्र विकास बोर्डका अध्यक्ष दिनेश डिसीले चलचित्र विकास बोर्डको सहकार्यमा निकै राम्रो महोत्सव सम्पन्न भएको बताए । उनले पछिल्लो समय नेपालमा हुने गरेका अन्तराष्ट्रिय महोत्सवले नेपाललाई विश्वमा फिल्ममार्फत चिनाउन थालेको बताए।