काठमाडौं :
अभिनेता तथा निर्देशक माओत्से गुरुङ निर्देशित चलचित्र ‘पेन्सन पट्टा’को पहिलो लुक सार्वजनिक गरिएको छ। असार १५ को अवसर पारेर निर्माण टिमले आगामी भदौ २६ गते प्रदर्शनमा आउने फिल्मको तीन फरक शैलीका पोस्टर सार्वजनिक गरेको हो। साथै आजैबाट यस चलचित्रको प्रचारप्रसार औपचारिक रूपमा थालेको छ।
सार्वजनिक पोस्टरहरूले चलचित्रको मूल कथावस्तु, पात्रहरूको जीवनयात्रा, पारिवारिक सम्बन्ध, संघर्ष र ग्रामीण परिवेशलाई कलात्मक ढंगले चित्रण गरेका छन् । पहिलो पोस्टरमा दयाहाङ राई र गौमाया गुरुङ गाउँको परिवेशमा प्रस्तुत छन् । गौमायाको काखमा रहेको पाठो र दयाहाङको भावपूर्ण अभिव्यक्तिले सरल ग्रामीण जीवन, आत्मीयता र मानवीय संवेदनालाई संकेत गर्छ ।
दोस्रो पोस्टरमा दुवै कलाकार हात समातेर झरनाको बाटो हुँदै यात्रा गरिरहेका देखिन्छन्। डोको बोकेकी गौमाया र भारीसहित अघि बढिरहेका दयाहाङको दृश्यले संघर्ष, प्रेम, सहयात्रा र जिम्मेवारीपूर्ण जीवनको अनुभूति गराउँछ । प्राकृतिक सौन्दर्यबीचको उक्त दृश्यले चलचित्रको भावनात्मक पक्षलाई थप प्रभावशाली बनाएको छ ।
तेस्रो पोस्टरमा दयाहाङ सैनिक पोसाकमा प्रस्तुत छन् भने गौमाया परम्परागत गुरुङ पहिरनमा देखिएकी छन् । पृष्ठभूमिमा रहेका युवा पात्रहरूको उपस्थितिले प्रेम, प्रतीक्षा, परिवार र पुस्तान्तरणको कथालाई संकेत गरेको छ। समग्रमा पोस्टरहरूले ‘पेन्सन पट्टा’ पूर्वलाहुरेको जीवनमा मात्र सीमित नभई नेपाली समाज, पारिवारिक सम्बन्ध र मानवीय मूल्यको गहिरो कथा बोकेको चलचित्र रहेको आभास गराउँछन् ।
‘माओत्से गुरुङ फिल्मस्’ को ब्यानरमा निर्माण भएको चलचित्रले आशा, संघर्ष र मानवीय संवेदनालाई केन्द्रमा राख्दै जीवनमा लक्ष्य प्राप्तिका लागि गर्नुपर्ने प्रयासको कथा प्रस्तुत गर्ने निर्देशक गुरुङले बताएका छन् ।
चलचित्रमा दयाहाङ राई, गौमाया गुरुङ, बुद्धि तामाङ, विल्सन विक्रम राई, पुष्कर गुरुङ, पाशुपति राई, स्वर्गीय सुनिल थापा, सोल गुरुङ, मनोज गुरुङ, अनुशा राई तथा लुनिभा तुलाधरलगायतका कलाकारहरूको अभिनय रहेको छ । कथा तथा निर्देशन माओत्से गुरुङकै रहेको यस चलचित्रको छायांकन सुशन प्रजापति, सम्पादन केर डी। कोइच लिनुच, कलरिस्ट राजेन्द्र मोक्तान, साउन्ड डिजाइन उत्तम न्यौपाने, सिंक साउन्ड नवीन श्रेष्ठ, भिएफएक्स मनोज श्रेष्ठ र कला निर्देशन राजु याक्चाले गरेका छन्।
मिन कोन्मे गुरुङ, भोजबहादुर गुरुङ, माया गुरुङ र सपना गुरुङ निर्माता रहेको चलचित्रमा डीबी गुरुङ प्रोडक्सन म्यानेजर छन् । हर्क साउद, शिव बराइली र सूरज तमुका शब्द रहेका गीतमा मनोज थापा मगर, शिव बराइली र सूरज तमुको संगीत सुन्न पाइनेछ । चलचित्रको नेपाल वितरणको जिम्मेवारी आरआर फिल्म्सले लिएको छ ।
निर्माण पक्षका अनुसार ‘पेन्सन पट्टा’ को अन्तर्राष्ट्रिय प्रदर्शन अधिकार पनि उत्साहजनक रूपमा विभिन्न मुलुकमा बिक्री भइसकेको छ । हालसम्म हङकङ, अष्ट्रेलिया, न्युजिल्यान्ड र बेलायतका लागि प्रदर्शन अधिकार बिक्री भइसकेको छ भने अन्य देशहरूसँग पनि प्रदर्शनबारे छलफल भइरहेको निर्देशक माओत्से गुरुङले जानकारी दिएका छन्। नेपाली डायस्पोराको उल्लेख्य उपस्थिति रहेका मुलुकहरूमा समेत चलचित्र प्रदर्शन गर्ने तयारी भइरहेको निर्माण टिमको भनाइ छ ।
हरितालिका तीजको अवसर पारेर भदौ २६ गते देशभर प्रदर्शनमा आउने ‘पेन्सन पट्टा’ ले ग्रामीण जीवन, पारिवारिक सम्बन्ध, प्रेम, त्याग र मानवीय संवेदनालाई सशक्त रूपमा पर्दामा उतार्ने अपेक्षा गरिएको छ ।
