काठमाडौं :
अभिनेत्री रेखा थापाले किताब र सिनेमा दुवै माध्यम समाजका कथा बोकेर आउने भएकाले उस्तै प्रभावकारी हुने बताएकी छन्। शुक्रबार नेपाल पुलिस क्लबमा आयोजित किताब जत्राको दोस्रो दिन उनले आफू नियमित रूपमा किताब पढ्ने र नेपाली पुस्तक तथा फिल्ममा दुःखका कथा बढी देखिने टिप्पणी गरिन्। “समाज हाँसिरहेको कथा कहिले देखाउन पाउँलाँ?” उनले प्रश्न गरिन्।
सहजकर्ता नरेश भट्टराईले राजनीतिक सहभागिताबारे सोध्दा रेखाले यसपटक आफू ‘राजनीतिक दृष्टा’ मात्र रहने र फिलिममै सक्रिय रहने बताइन्।
पढाइमा राम्रो भए पनि कलाप्रतिको आकर्षण बढ्दै जाँदा शैक्षिक रुचि घटेको उनले सुनाइन्। रुचिको क्षेत्रमा दक्षता हासिल गर्दा मात्र सफलता सम्भव हुने भन्दै उनले सफल व्यक्तिको परिचय पढाइसँग मात्र जोड्न नहुने बताए। “बुद्धको पढाइ सोधिन्छ? उहाँको कर्मले प्रभाव पारेको हो,” रेखाको तर्क थियो।