काठमाडौँ/
नेकपा (माओवादी केन्द्र) का अध्यक्ष एवम् पूर्वप्रधानमन्त्री पुष्पकमल दाहाल ‘प्रचण्ड’ ले आउँदो आमचुनावमा अरू दलसँग नमिली एक्लै जित्ने र भ्रष्टहरूलाई कारबाही गर्ने बताए ।
पार्टी केन्द्रीय कार्यालयमा पेरिसडाँडामा आज आयोजित पार्टी प्रवेश कार्यक्रममा अध्यक्ष प्रचण्डले आउँदो चुनाव जितेर भ्रष्टाचारविरुद्ध अर्को अभियान चलाउने बताएका हुन ।
पछिल्लो पटक माओवादीले सरकारको नेतृत्व गर्दा दर्जनौँ भ्रष्टाचारका फाइल खोलिएको र नागरिकको साथ पाएको दाबी गर्दै प्रचण्डले १८ महिना सरकारको नेतृत्वमा रहँदा सुशासन, सामाजिक न्यायका पक्षमा अहोरात्र काम गरेको बताउनुभयो । सुशासनका पक्षमा विजय भएर सरकारबाट निस्किएको उनको दाबी छ ।
आफू नेतृत्वको सरकार किन ढल्यो र कांग्रेस र एमाले मिलेर किन नयाँ सरकार बन्यो भन्ने विषय बच्चाबच्चालाई पनि थाहा भएको भन्दै प्रचण्डले यो सरकारले भ्रष्टाचारीलाई जोगाउनेबाहेक अर्को काम नगर्ने जिकिर गरे।