काठमाडौं :
शुक्रबारबाट हलमा लाग्न लागेको फिल्म ‘नम्बरी सुन’लाई लिएर निर्माण पक्ष उत्साहित रहेका छन्। राजु गिरीको निर्देशनमा बनेको यो फिल्ममा अभिनेता सरोज खनाल फरक भुमिकामा देखिदैछन्। उनी फिल्ममा मुखिया चरित्रमा देखिँदैछन्। उनको अनुभवमा ‘पञ्चायत’, ‘मोदीबेनी’मा निभाएको भन्दा फरक ‘नम्बरी सुन’मा चरित्र निर्वाह गरेका छन्।
‘नम्बरी सुन’मा मेरो युवावस्थादेखि वृद्धावस्थासम्मको गेटअप छ। अघिल्ला फिल्ममा मलाई बुढो मुखियाका रुपमा देखाइएको थियो। तर नम्बरी सुनमा फरक युवा गेटअपमा देखिन्छ’, सरोज भन्छन्।
‘नम्बरी सुन’मा आफ्नो चरित्र क्रुर नभएको सरोजको भनाई छ।
‘मेरो क्यारेक्टर सुरुमै क्रुर छैन। फिल्ममा मुखियाको एउटा मायालु परिवार छ। उसले परिवारसँगै गाउँका सबैलाई माया गर्छ । फिल्मले सुन बनाउन आउनेको इतिहास बोल्छ । सुन बनाउने कामको सुरुवात मेरै घरबाट हुन्छ’, सरोज भन्छन्, ‘विस्तारै कथा अगाडि बढ्दै गएपछि समय र परिस्थितिले उसलाई केही क्रुर पनि बनाउँछ । फिल्ममा म कमलो हृदयको मान्छे पनि छु । ट्रेलरमा हेर्नुभयो होला कि म ३,४ ठाउँ नराम्ररी रोएको छु । क्रर मान्छे त्यसरी कहिल्यै पनि रुँदैन।’
सरोजका अनुसार ‘रियल’मा आफू मुखिया जस्तो नदेखिए पनि ‘रिल’मा भने त्यस्तो क्यारेक्टर निभाउँदा उनलाई मज्जा लाग्दो रहेछ। ‘कलाकारको पहिचान भनेकै त्यही हो । अब जस्तो देखिन्छु, त्यस्तै देखाउनु, त्यस्तै गर्नु, अथवा मलाई सजिलो हुने जनराको फिल्ममात्रै मैले गर्नु भनेको त म कलाकार नै होइन नि’, उनी भन्छन्।
सरोजको अनुभवमा उनीसँग कतिपय निर्देशक रिसाएका रहेछन्।
‘म काम गरेको हिसाबले न्याय दिने कोशिस गर्छु । कति निर्देशक मसँग रिसाउनु पनि हुन्छ। यो मान्छेलाई लियो भने त्यहाँ ओभरटेक गर्न खोज्छ भन्ने उहाँहरुको बुझाई छ’, सरोज भन्छन्, ‘हामी भलै क्यारेक्टर रोल गरिरहेका छौं, तर त्यो क्यारेक्टर यस्तो क्योक्टर हो, जसले मेन क्यारेक्टरलाई बुस्ट अप गर्छ । हामी नभई त्यो मान्छे फिल्मको मेन क्यारेक्टर हुनै सक्दैन। हामी लुज भयौं भने फिल्म पुरै लुज हुन्छ । फिल्ममा काम गरेको झण्डै ४० वर्ष भइसक्यो । कस्तो गर्दा राम्रो हुन्छ भनेर कसैले सल्लाह लिनुहन्छ भने दिइन्छ । हैन ‘मेरै गोरुको बाह्रै टक्का’ भन्ने निर्देशक पनि हुनुहुन्छ, उहाँहरुले जे भन्नुुन्छ त्यो पनि गर्दिन्छु ।’
सरोजलाई फिल्म ‘पञ्चायत’ बिग्रिएकोमा धेरै चित्त दुखेको रहेछ । ‘केही फिल्म व्यापक तरिकाले खिच्न पाएको भए अझ राम्रो हुन्थ्यो कि जस्तो लाग्छ। यसमा पञ्चायत पनि पर्छ । यो फिल्म बिग्रिएकोमा सधैं चित्त दुख्छ । किनभने त्यस्तो क्यारेक्टर सितीमिती पाइँदैन । त्यस्तो फिल्म बन्दैनन्। फिल्म निर्देशक शिवम अधिकारीले अलिक गम्भीर रुपले बनाइदिनुभएको भए त्यो फिल्म एउटा ‘कोशेढुंगा फिल्म’ बन्थ्यो’, सरोज गुनासिन्छन्।