काठमाडौं :
विश्व संगीत जगत्का ‘पप सम्राट’ माइकल ज्याक्सनको जीवनकथामा आधारित फिल्म ‘माइकल’ ले विश्व बक्स अफिसमा ऐतिहासिक कीर्तिमान कायम गरेको छ। हलिउड सञ्चारमाध्यम भेराइटीका अनुसार, यो फिल्म विश्वभर १ अर्ब डलर (१.००१ अर्ब डलर) को कमाइको आँकडा पार गर्ने इतिहासकै पहिलो बायोपिक (जीवनीमा आधारित) फिल्म बनेको छ।
यस ऐतिहासिक कमाइसँगै ‘माइकल’ ले सन् २०२३ मा प्रदर्शनमा आएको चर्चित फिल्म ‘ओपेनहाइमर’ को रेकर्ड समेत भंग गरिदिएको छ। भौतिकशास्त्री जे. रोबर्ट ओपेनहाइमरको जीवनीमा बनेको ‘ओपेनहाइमर’ ले कुल ९७ करोड ५० लाख डलर कमाएको थियो, जसलाई पछार्दै माइकलको बायोपिकले नयाँ कीर्तिमान खडा गरेको हो।
फिल्मले अन्तर्राष्ट्रिय बजारबाट ६२ करोड ९८ लाख डलर र उत्तर अमेरिकी घरेलु बजारबाट ३७ करोड १८ लाख डलर संकलन गरेको छ। प्रदर्शनको पहिलो सप्ताहन्त (ओपनिङ विकेन्ड) देखि नै आक्रामक व्यापार गरेको यस फिल्मले उत्तर अमेरिकामा ९ करोड ७० लाख डलर र विश्वभर २१ करोड ७० लाख डलरको सानदार ओपनिङ गरेको थियो।
सन् २०२६ मा बक्स अफिसमा तहल्का मच्चाउने फिल्महरूको सूचीमा ‘माइकल’ दोस्रो स्थानमा परेको छ। यस वर्ष १ अर्ब डलरको क्लबमा प्रवेश गर्ने पहिलो फिल्म ‘द सुपर मारियो ग्यालेक्सी मुभी’ (१ अर्ब ८० लाख डलरभन्दा बढी) हो भने डिज्नीको ‘टोय स्टोरी ५’ (८७ करोड ९१ लाख डलर) पनि चाँडै यो क्लबमा पुग्ने दौडमा रहेको छ।
एन्टोइन फुक्वाको निर्देशनमा तयार भएको यस फिल्ममा माइकल ज्याक्सनको बाल्यकाल (ज्याक्सन फाइभ समूह) देखि सफलताको शिखरमा पुगेर ‘किङ अफ पप’ बन्नेसम्मको उतारचढावपूर्ण यात्रालाई देखाइएको छ। फिल्मको मुख्य विशेषता के छ भने, यसमा माइकल ज्याक्सनको भूमिका उनकै वास्तविक भतिजा जाफार ज्याक्सनले निभाएका छन्। फिल्ममा जाफारका साथै कोलम्यान डोमिङ्गो, निया लङ र माइल्स टेलर जस्ता कलाकारहरूको सशक्त अभिनय रहेको छ।