काठमाडौं :
पछिल्लो समयका चर्चित गायक सीडी विजय अधिकारी र गायिका समिक्षा अधिकारीको युगल स्वरमा सजिएको नयाँ गीत ‘जाउ हिँडौँ बटौली’ को म्युजिक भिडियो सार्वजनिक भएको छ।
नेपाली संगीत तथा चलचित्रको विकास र प्रवर्द्धनमा सक्रिय अग्रणी संस्था हाइटेक इन्टरटेनमेन्टको प्रस्तुति रहेको गीतमा सुष्मा सिग्देलको शब्द रचना र अनिल शाहीको संगीत रहेको छ।
गीतको भिडियोमा पछिल्लो समयका चर्चित म्युजिक भिडियो जोडी उषा उप्रेती र प्रभातपाल ठकुरीको अभिनय देख्न सकिन्छ। भिडियोको छायांकन सौरभ लामाले गरेका छन् भने सम्पादन मित्र डी गुरुङ र कलर ग्रेडिङ सुदीप पाण्डेले गरेका हुन्।
कोरियोग्राफी र निर्देशन चर्चित निर्देशक कविराज गहतराजले गरेका छन्। भिडियोमा आधुनिक र मौलिकताको समिश्रण झल्किने दृश्य संयोजन गरिएको छ।
संगीतकार अनिल शाही, जसले यसअघि थुप्रै चर्चित गीतहरूमा संगीत दिएका छन्, यस गीतमा संगीत भर्ने मात्र होइन, गायन र मोडलिङमा पनि सक्रिय छन्। उनी गीतारवादनमा समेत पोख्त मानिन्छन्। शाहीले यसअघि केही म्युजिक भिडियोहरू निर्देशन समेत गरिसकेका छन्।
‘जाउ हिँडौँ बटौली’ गीतले श्रोता–दर्शकमाझ सकारात्मक प्रतिक्रिया पाइरहेको निर्माण पक्षले जनाएको छ।