काठमाडौं,
न्याय सेवा आयोगले नेपाल न्याय सेवाका तीन जना सहसचिवलाई सचिव (राजपत्राङ्कित विशिष्ट श्रेणी) पदमा बढुवाका लागि सिफारिस गरेको छ ।
आयोगको मंगलबार बिहान बसेको बैठकले ३ सहसचिवलाई सचिवमा बढुवा सिफारिस गरेको न्याय सेवा आयोगकी प्रवक्ता रामप्यारी सुनुवारले जारी गरेको विज्ञप्तिमा उल्लेख छ ।
आयोगको निर्णयानुसार बढुवा सिफारिसमा पर्नेहरूमा सर्वोच्च अदालतका सह–रजिस्ट्रारद्वय ठगीन्द्र कट्टेल र बाबुराम दाहाल छन् । उनीहरू दुवैजनालाई सर्वोच्च अदालतको रजिस्ट्रार पदमा बढुवाका लागि सिफारिस गरिएको हो ।
त्यस्तै, न्याय परिषद्का कायममुकायम सचिव रामप्रसाद भट्टराईलाई न्याय परिषद्को सचिव पदमा बढुवा गर्न सिफारिस गरिएको छ ।
आयोगले उनीहरूको बढुवा नियुक्ति तथा पदस्थापनका लागि सिफारिस गरेको विज्ञप्तिमा उल्लेख छ ।