पोखरा,
पोखरा महानगरपालिका ले पोखरा बसपार्क क्षेत्रमा बसोबास गर्दै आएका भूमिहीन दलित, भूमिहीन सुकुम्वासी तथा अव्यवस्थित बसोबासीलाई आवश्यक कागजातसहित आफ्नो विवरण पेस गर्न अत्यन्त जरुरी सूचना जारी गरेको छ ।
महानगरपालिकाका अनुसार यसअघि निस्सा वितरण गरिएका पोखरा उपत्यका नगर विकास समिति को स्वामित्वमा रहेको पोखरा बसपार्कस्थित जग्गामा बसोबास गरिरहेका परिवारले तोकिएको ढाँचामा आफ्नो तथा परिवारको विवरण भरी मिति २०८३ जेठ ८ गतेभित्र वडा नं। ९ को कार्यालयमा बुझाउनुपर्नेछ ।
महानगरपालिकाले सूचना जारी गर्दै सम्बन्धित सबैलाई तीन दिनभित्र विवरण पेस गर्न आग्रह गरेको हो ।
सूचनाअनुसार विवरण बुझाउँदा पोखरा महानगरपालिकाबाट वितरण गरिएको निस्साको प्रतिलिपि, घरमूली तथा परिवारका सदस्यहरूको नागरिकता प्रमाणपत्रको प्रतिलिपि र नाबालकको हकमा जन्मदर्ता प्रमाणपत्रको प्रतिलिपि अनिवार्य रूपमा संलग्न गर्नुपर्नेछ ।
त्यसैगरी घरमूली र परिवारका सदस्यबीचको नाता प्रमाणित गर्ने कागजात वा घरमूली स्वयंले नाता खुलाएको स्वःघोषणा पत्र पनि पेस गर्नुपर्ने महानगरले जनाएको छ ।
महानगरपालिकाले उक्त विवरण संकलनलाई बसोबास व्यवस्थापन तथा भूमिसम्बन्धी प्रक्रिया अगाडि बढाउने तयारीको भागका रूपमा लिएको जनाएको छ ।