काठमाडौ :
अभिनेत्री रेजिना उप्रेतीले आफ्नो एक दशक अघि ५ दर्जन भन्दा बढि फिल्ममा अभिनय गरिन्। उनले अभिनय गरेका निकै फिल्मले राम्रो ब्यापार गरेका थिए। फिल्मबाट राम्रो सफलता पाइरहेका बेला विवाह बन्धनमा बाँधिइन्। त्यसपछि सन्तान भएपछि उनको अभिनय यात्रामा विश्राम लाग्यो। यसैबीच उनी ९ वर्षको अन्तरालमा अन्तत फिल्ममा कमब्याक गरेकी छन्।
उनले फिल्म ‘मोदीबेनी’मार्फत कमब्याक गरेकी हुन्। यो फिल्मको नयाँ गीत रिलिज कार्यक्रममा उपस्थित भएकी उनले ९ वर्ष फिल्म नगर्नुको कारण बारेमा पत्रकारलाई जानकारी गराइन्। रेजिनाले आफुले भने जस्तो पात्रमा प्रस्ताव नआएको फिल्ममा काम नगरेको बताईन्। उनले भनिन्, ‘मैले ९ वर्षदेखि फिल्म गरिनँ । कलाकारिता भने मनमा थियो । काम गर्नुपर्छ भन्ने भइरहेको थियो । म राम्रो क्यारेक्टर र टिम पर्खिरहेको थिएँ । बीचमा अफर नआएको पनि होइन । तर, काम गर्ने खालको अफर नै आएन ।’
उनले आफुले सोचे अनुसारको पात्र ‘मोदीबेनी’मा पाएको हुनाले फिल्मा काम गरेको बताईन्। निकै उत्साहित रहेकी उनले भनिन्,‘यो फिल्मको कथा र टिम हेरेपछि कमब्याकका लागि यो सही समय हो भन्ने लाग्यो । यो एकदमै जोशले भरिएको टिम हो । यो टिमको उर्जाले मलाई पनि कलाकारिता छोड्नु हुँदैन भन्ने महसुस भएको छ।’
परिचय डटकमसँगको कुराकानीमा आफुलाई अहिलेका नयाँ पुस्तासँग अभिनय गर्न मन रहेको समेत सुनाईन्। पछिल्लो पुस्ताका अनमोल केसी,प्रदीप खड्का,दयाहाङ राई लगायतका कलाकारसँग अभिनय गर्न इच्छा रहेको बताईन्। यो फिल्मपछि लगातार फिल्ममा काम गर्न पाइन्छ कि भन्ने विश्वास उनको छ।